«Հրապարակ»-ը գրում է. «Հովիկ Աբրահամյանի երազանքը թեև իրականացավ, բայց նա շարունակում է կռիվ տալ Տիգրան Սարգսյանի շվաքի հետ: Եվ դա արտահայտվում է բոլոր հարթություններում՝ ստվերի դեմ պայքար լինի, դպրոցականների հետ շփումներ, թե կադրային քաղաքականություն: Հրապարակային ելույթներում ոչ մի բացասական բան չի ասում, անգամ պաշտպանում է իր նախորդին, իսկ քայլեր ձեռնարկելիս ամեն ինչ անում է Տիգրան Սարգսյանի թողած հետքը ջնջելու, նրա կադրերին հեռացնելու, նրա հեռացրած կադրերին վերադարձնելու համար: Վերջերս, օրինակ, կառավարության գործերի կառավարչի պաշտոնում է նշանակել մի մարդու, ով Տիգրան Սարգսյանի՝ ատկատների դեմ պայքարի զոհը դարձավ: Խոսքը քաղաքաշինության նախարարության ԾԻԳ-ի նախկին տնօրեն Սարգիս Բաղինյանի մասին է, ով պաշտոնանկ եղավ քաղաքաշինության ոլորտում 2012 թվականին բացահայտված խախտումների, չարաշահումների, յուրացումների, ատկատների սկանդալի շրջանակում: Բնականաբար, ԾԻԳ-ն այս գործում իր ուրույն դերն ունի, և եթե վարչապետը նպատակ էր դրել արատավոր երևույթների դեմ պայքարելու, պետք է որ հաջորդեին նման պաշտոնանկությունները: Բաղինյանն այդ պաշտոնում նշանակվել էր նույն Տիգրան Սարգսյանի որոշմամբ՝ 2011 թվականի հունվարին: Եվ երբ մի շարք քաղաքաշինական մութ գործարքներ բացահայտվեցին, թիրախում հայտնվեց նաև ԾԻԳ-ի տնօրենը: Մինչ նրան ազատելը նրա մասին բողոքներ էին հայտնվում նաև Տիգրան Սարգսյանի անձնական բլոգում, որը նա ստեղծել ու կոչել էր «Բողոքի գիրք»: Այնտեղ Բաղինյանի նշանակվելուց 10 ամիս անց հայտնվել էր հետևյալ բովանդակությամբ մի բողոք. «ՀՀ քաղաքաշինության նախարարությանը պատկանող քաղաքաշինական ԾԻԳ-ի պետը` Ս. Բաղինյանը, զբաղված է կաշառակերությամբ, այլ ոչ թե իրեն վերապահված լիազորությունների ու պարտականությունների կատարմամբ:
Ծավալեք քննություն և ամեն ինչ կպարզեք, իհարկե, եթե Ձեզ հաջողվի մուտք գործել Ս. Բաղինյանի կառուցած ամրոցը (ի դեպ, նրա աշխատասենյակն ավելի լավ է հսկվում տեսախցիկներով և «մանգլավիկներով», քան նախարարի աշխատասենյակը)»:
Թե որքանով այս գրությունն իր դերը խաղաց պաշտոնանկության հարցում, հայտնի չէ, չի բացառվում, որ դա ևս կազմակերպված էր: Պատահական չէ, որ ատկատի դեմ պայքարի հետևանքով ժամանակին պաշտոնանկ եղած Բաղինյանին վստահվել է նմանատիպ ոլորտ՝ կառավարության գործերի կառավարչի պաշտոնը: Սա նշանակում է, որ նա զբաղվելու է կառավարության շենքերի շինաշխատանքներով, ինչն արդեն ինքնին հուշում է պաշտոնի ֆինանսական ՕԳԳ-ի մասին:
Նշենք, որ քաղաքաշինության նախարարության ԾԻԳ-ի տնօրենի պաշտոնում շարունակում է աշխատել Տիգրան Սարգսյանի հորեղբորորդին՝ Հրայր Սարգսյանը, ում այս պաշտոնին նշանակեցին Բաղինյանից հետո և հանձնարարեցին վերացնել ատկատները:
Մանրամասնեռրը՝ թերթի այսօրվա համարում:
