«Կանխարգելիչ գիլյոտին» ծրագրի նպատակը օրենսդրության վերանայումն է, հեշտացումը բիզնեսի և բնակչության համար և ընդհանուր առմամբ՝ այդ կարգավորումներին համապատասխան ծախսերի 50 տոկոսի կրճատումը»,- այսօր գործարար միջավայրի կարգավորման ընթացակարգերի պարզեցման վերաբերյալ դասընթացի ժամանակ ասաց Օրենսդրության կարգավորման ազգային կենտրոնի տնօրեն Արմեն Եղիազարյանը, ով նաև «Կանխարգելիչ գիլյոտին» ծրագրի համակարգողն է:
Եղիազարյանի խոսքով՝ ծրագիրը նպատակաուղղված է նրան, որ մարդիկ ավելի հեշտ շփվեն պետության հետ, քիչ ժամանակ և փող ծախսեն, վերացնեն ավելորդ փաստաթղթաշրջանառությունը: Նրանք արդեն ուսումնասիրել են 9 ոլորտ և առաջիկայում պետք է ուսումնասիրեն ևս 20-ը՝ հասկանալու համար, թե որ ոլորտում ինչ աշխատանքներ կան տանելու, որպեսզի լրացուցիչ ծախսերը կրճատվեն:
«Եթե նախարարությունները, մյուս ոլորտները մեր բոլոր առաջարկությունները ընդունեն, մոտ 25 միլիարդ դրամի խնայողություն կլինի: Իսկ ծրագրի ավարտից հետո, մեր հաշվարկներով, մոտ 60 միլիարդի խնայողություն կլինի»,- հավելեց Եղիազարյանը:
«Կանխարգելիչ գիլյոտին» ծրագրի 2-րդ փուլի համար Հայաստան է հրավիրվել հենց այդ ծրագրի ստեղծող, փորձագետ Սքոթ Յակոբսը, ով պետք է տարբեր գերատեսչությունների աշխատողների հետ թրեյնինգների միջոցով հասնի ցանկալի արդյունքի:
Նշենք, որ այս ծրագիրը տարածաշրջանում ներդրվել է դեռևս միայն Հայաստանում, բայց Սքոթ Յակոբսի խոսքով՝ այն կիրառվում է աշխարհի մի շարք երկրներում: «Հայաստանը պետք է փոխի իր օրենսդրությունը: Հայաստանը, ինչպես շատ երկրներ, կհասնի հաջողությունների, եթե շուկաները աշխատեն, իսկ շուկաները կաշխատեն միայն այն դեպքում, երբ իրավական համակարգ լինի, հարգվի մասնավոր սեփականությունը և լինի կոռուպցիայի ցածր մակարդակ»,- ասաց Յակոբսը:
