Ազգային ժողովում 2013 թվականի բյուջեի կատարողականի հաշվետվության քննարկումները շարունակվում են: ԱԺ պատգամավոր Խաչատուր Քոքոբելյանը հունիսի 2-ին Էկոնոմիկայի նախարար Կարեն Ճշմարիտյանին դիմելով՝ հետաքրքրվեց՝ որքան գումար է ծախսվել օդի ազատականացման համար:
«Ես ուրախ եմ, որ իշխանություններն անընդհատ ասում են օդի ազատականացում, այդտեղից բխում է, որ նախկինում օդը ազատականացված չէր: Որքա՞ն է ծախսվել օդի ազատականացման համար, և արդյոք համարու՞մ եք, որ օդն ազատականացված է արդեն, որովհետև բոլորս գիտենք, որ տնտեսությունը և քաղաքացիների վիճակը առանց այն էլ այս սուղ պայմաններում ուղղակիորեն կախված է թե շնչելու օդից, թե արտաքին աշխարհի օդից»,- ասաց նա: Քոքոբելյանը նշեց, որ հաշվետվության մեջ տեսել է՝ պետական բյուջեից էկոնոմիկայի նախարարության մասով հատկացումներ են արվում՝ որպես պետական աջակցություն գյուղատնտեսական հողօգտագործողին, իսկ կոնկրետ վարկերի սուբսիդավորման համար 634 մլն, այսինքն՝ մոտ 87 տոկոս հատկացվել է հողօգտագործողներին:
«Հետաքրքիր է՝ ինչպե՞ս է հատկացվել, ինչի՞ համար և ի՞նչ է արվել»,- ասաց նա:
Նիստը վարող, ՀՀԿ-ական Վարդան Այվազյանը նկատեց, թե շփոթմունք կա, հավանաբար գյուղնախարարության մասով է գրվել: «Դե իրենց մոտ է, իրենց պլանավորումով է: Ամեն դեպքում, շատ կարևոր հարց ա: Կարող է՝ ընդեղ էլ ա, ընդեղ էլ, պարոն Այվազյան»,- նշեց Քոքոբելյանը: Նա նշեց, որ նաև արտասահմանում առևտրային ներկայացուցիչների պահպանման 93 մլն գումար է նշված, ու թեև ինքը չի կարծում, որ արտասահմանում պետք չի ներկայացուցիչներ ունենալ, բայց նաև չի կարողանում հասկանալ, թե սա ինչի վրա է ծախսվել:
«Իհարկե, կարծում եմ՝ դուք կհնչեցնեք, որ տաղավարներ է պահվել և այլն, բայց ամեն դեպքում սուղ պայմաններում դա էլ փող ա: Կոնկրետ արտադրողների, ձեռներեցների շրջանակում երբևիցե առիթ չեմ ունեցել, որ անմիջականորեն իրենք նշեն, որ զգում են պետական հոգածությունը և զգացել են մասնավորաբար էկոնոմիկայի նախարարության՝ իրենց աջակից լինելու հանգամանքը: Խոսքը, ինչպես դուք եք նշում, մեկ կամ երկու մարդու չի վերաբերում, ում պիտի պեղենք, որ գտնենք, այստեղ պետք է արդեն հանրային ընկալման հարց լինի»,- ասաց նա:
Ճշմարիտյանը նախ անդրադարձավ երրորդ հարցին, նշեց, որ այստեղ աշխատանքն ուղղված է ընդհանրապես բոլոր գործիքների մասին ամբողջ բիզնես համայնքին տեղեկացնելուն, բոլորը պիտի իմանան, թե պետությունն ինչ աջակցության ձևեր ու մեխանիզմներ ունի: «Նրանց կուղղորդեն, էնպես է ստացվել, որ եթե մեկը դիմում է, նրան անգամ դիմումներ էլ են սովոեցնում գրել: Աշխատանքն այդ առումով պիտի արվի: Գիտեք, իրենք թող տեղյակ լինեն, իսկ ընտրել՝ աջակցություն ստանան, թե ոչ, արդեն իրենք թող ընտրեն: Ոչ ձեզ, ոչ ինձ, ոչ մյուս գործընկերներին այս դեպքում չեն ասի, որ աջակցության մեխանիզմներ չկան»,- ասաց նա: Նախարարը տեղեկացրեց, որ առևտրական երեք ներկայացուցչություն ունենք՝ Բրյուսելում, Ժնևում, Մոսկվայում: Մոսկվայինը կոնկրետ ընկերություն է, որն իր վրա վերցրել է այդ ֆունկցիան, Կառավարությունը նրան տվել է այդ իրավասությունը, նա պետական բյուջեից ոչ մի աջակցություն չի ստանում, հակառակը՝ իր միջոցներով պահում է և ցուցահանդեսային տաղավարը և իր գործունեությունը փայլուն է անում արդեն երկար տարիներ:
«Բրյուսելում ու Ժնևում արդեն այդ ներկայացուցիչների պահպանման ծախսերն են, ընդ որում՝ ասեմ, որ դրանք էլ շատ սուղ են, այսինքն՝ չեն համապատասխանում այն պահանջներին, որ կան: Հավասարեցված են ԱԳ նախարարության կարծեմ խորհրդականի և ստատուսով, և աշխատավարձով, աստիճանին, այսինքն՝ այդ ծախսը միայն դրան է վերաբերում»,- ասաց նա:
Ճշմարիտյանը տեղեկացրեց, որ բաց երկնքի քաղաքականությունը հայտարարվել է նախորդ աշուն, գումարը զուտ հետազոտությունների վրա է ծախսվել, այդտեղ աջակցության խնդիր չկա: «Այո, հայտարարվել է և ես կարող եմ տեղեկացնել, որ արդեն երկու – երեք ուղղություններով հուշագիր – պայմանագրեր են կնքվել: Իրանի հետ արդեն կնքվեց պայմանագիր, հիմա Իրաքի հետ ենք բանակցում: Փորձում ենք պայմանագրեր կնքել ոչ միայն եվրոպական, այլև Միջին Արևելքի և Պարսից ծոցի երկրների հետ, որովհետև առաջնային մեր աշխարհագրական տեղը բավական հարմար է այդ առումով, այս քաղաքականության շնորհիվ որոշակիորեն ավիափոխադրումների գներն են իջել»,- ասաց նա՝ հույս հայտնելով, որ մոտ քսան – քսանհինգ տոկոս ուղևորափոխադրումների աճ կլինի արդյունքում: