Հայաստանի իշխանությունները Ուկրաինայում տեղի ուենցող գործընթացների, ինչպես նաև հաստատված նոր իշխանությունների վերաբերյալ մինչ երեկ որևէ պաշտոնական գնահատական չէին տվել: Առաջ ընկնելով Ռուսաստանից՝ ՀՀ նախագահ Սերժ Սարգսյանը երեկ շնորհավորեց Ուկրաինայի նորընտիր նախագահ Պյոտոր Պորոշենկոյին՝ հույս հայտնելով, որ հայ-ուկրաինական հարաբերությունները էլ ավելի կզարգանան:
«Առաջին լրատվական»-ը Արևելյան գործընկերության հայաստանյան համակարգող Բորիս Նավասադրյանից հետաքրքրվեց, թե ի՞նչ է կարծում՝ Հայաստանի այս հայտարարությունը ի՞նչ հետևանքներ կարող է ունենալ։
«Անմիջական որևէ խնդիր չեմ տեսնում, որովհետև մենք համոզվել ենք, որ վերջին ամիսներին բավականին զգուշավոր են գործում մեր իշխանության ներկայացուցիչները և որևէ բան, որ կարող է լուրջ հետևանքներ ունենալ՝ դժվար թե անեն: Բայց այստեղ նաև պետք է նկատի ունենանք ընդհանուր մթնոլորտը, ընդհանուր միջավայրը, որտեղ գործում է և՛ Հայաստանը, և՛ Հայաստանի իշխանությունները: Սարսափելի հակաուկրաինական, հակաեվրոպական տրամադրություններ են Ռուսաստանի հասարակությունում, Ռուսաստանի էլիտայի մեծամասնության մոտ»:
Նավասարդյանը ընդգծեց, որ անմիջական հայտարարություն չի լինի, բայց նստվածք, այնուամենայնիվ, կթողնի․«Հիմա, ասենք, Ռուսաստանում շատերը հիշում են 2008 թվականի ռուս-վրացական պատերազմի ժամանակ Հայաստանի դիրքորոշումը: Այն ժամանակ էլ, ճիշտ է, բավականին զգուշավոր գործեց Հայաստանը, ակնհայտ որևէ արձագանք Ռուսաստանի կողմից չի եղել, բայց նստվածք թողել է: Նույնն էլ այսօր կարող է տեղի ունենալ, բայց դրանից խուսափել հնարավոր չէ, որովհետև եթե դու ամեն դեպքում գոնե առանձին հայտարարություններով քեզ ինքնիշխան պետություն ես պահում, դա անպայման նստվածք է թողնում Ռուսաստանում, որն ուղղակի չի համարում մեզ որևէ ինքնուրույն որոշում կայացնելու իրավունք ունեցող երկիր, ինքնուրույն շահեր ունեցող երկիր, այդ կարգի հասկացություններ, ցավոք, ո՛չ Ռուսաստանի հասարակության, ո՛չ Ռուսաստանի էլիտայի մոտ չկան»:
Մեր զրուցակցի կարծիքով՝ նրանք համարում են, որ այն, ինչ ձեռնտու է Ռուսաստանին, պետք է ձեռնտու լինի Հայաստանին, Բելառուսին, Ղազախստանին, ինչը օբյեկտիվորեն հնարավոր չէ․«Նրանք ցանկանում են անհնարինը, և մենք պետք է հասկանանք մեր շահը որն է»:
Հարցին, թե այս դեպքում Հայաստանը իր շահերից ելնելո՞վ է շնորհավորել Ուկրաինայի նախագահին, Բորիս Նավասարդյանը պատախանեց․«Ուկրաինան մեծ երկիր է, բավականին մեծ հեռանկարներ ունեցող երկիր է, չգիտենք՝ ոնց կիրականացնի այդ հեռանկարները, բայց դրանք ակնհայտորեն մեծ են և արհամարհել այդ երկրում տեղի ունեցածը, չփորձել որոշակի կամուրջներ ստեղծել ուկրաինական իշխանությունների և հասարակության հետ՝ մեզ համար կործանարար է. այնպես որ՝ շնորհավորանքը մեր նախագահի կողմից այն մինիմումն էր, որ կարող էր անել»:
Լուսանկարը՝ Photolure-ի