Վերջին մեկ տարում ցանցահենները կարողացել են հասանելիություն ստանալ ԱՄՆ մոտ 110 մլն բնակչի անձնական տվյալների: 110 միլիոնը կազմում է երկրի չափահաս բնակչության մոտ կեսը: Այս մասին հայտնում է CNN-ը:
Ինչպես ասվում է Միչիգանի մասնագիտացված հետազոտական Ponemon ընկերության զեկույցում, ընդհանուր առմամբ կիբերհանցագործները հասանելիություն են ստացել տարբեր կայքերում ամերիկացիների 430 մլն օգտահաշիվների: Ամենից շատ տուժել են Target առևտրային ցանցի հաճախորդները, որի համակարգչային համակարգերից գողացվել են 70 մլն մարդու անձնական տվյալներ: Բացի այդ, կիբերհարձակման են ենթարկվել այնպիսի ընկերություններ, ինչպիսիք են՝ Adobe-ը, Snapchat-ը, AOL-ը և eBay-ը:
Մասնագետների խոսքով՝ ցանցահենային հարձակումների աճող թիվը բացատրվում է առցանց առևտրի ակտիվ զարգացմամբ, նաև նրանով, որ ցանցահենները սկսել են ավելի բարդ միջոցներ կիրառել կորպորատիվ համակարգչային ցանցեր ներթափանցելու համար:
Երեկ կիբերհանցագործության խնդրին նվիրված իր ամենամյա զեկույցն է ներկայացրել նաև PricewaterhouseCoopers միջազգային խորհրդատվական ընկերությունը: Հարցման ենթարկված ամերիկյան բիզնեսի 500 ներկայացուցիչներից մոտ 75 տոկոսը հայտարարել է, որ անցած տարի իրենց կազմակերպությունները ենթարկվել են ցանցահենային հարձակման:
ԱՄՆ գաղտնի ծառայության ներկայացուցիչ Էդ Լոուերիի խոսքով, ում մեջբերում է PricewaterhouseCoopers-ն իր զեկույցում, չնայած կիբերհանցագործությունից պաշտպանության համակարգում զգալի ներդրումներին՝ խաբեբաները շարունակում են խոչընդոտները հաղթահարելու միջոցներ գտնել:
