Եվրասիական տնտեսական բարձրագույն խորհրդի հերթական նիստը կկայանա մայիսի 29-ին Աստանայում, որտեղ նախատեսվում է Եվրասիական տնտեսական միության ստեղծման պայմանագրի ստորագրությունը։ Պաշտոնական հաղորդագրությունների համաձայն՝ Հայաստանը պետք է որ միանա միության ստեղծման աշխատանքներին, սակայն ռուսաստանցի որոշ փորձագետներ կասկածամիտ են այս հարցում:
«Առաջին լրատվական»-ի հետ զրույցում ռուսաստանցի հեղինակավոր քաղաքական վերլուծաբան, փորձագետ, ռուսաստանյան «Ռիա Նովոստի» լրատվական գործակալության նախկին վերլուծաբան Վադիմ Դուբնովն ասաց, որ Աստանայում իսկապես կստորագրվի Եվրասիական տնտեսական միության ստեղծման պայմանագիրը, սակայն ավանդական կազմով՝ առանց Հայաստանի, քանի որ Հայաստանի հարցը դեռևս լուծված չէ: Նրա կարծիքով՝ այսօր ոչ մեկը լրջորեն այս հարցն առաջ չի մղելու, քանի որ ներկայումս դա որևէ մեկին անհրաժեշտ չէ:
«Հայաստանի հարցում Ռուսաստանն ամենակարևորին հասել է սեպտեմբերի 3-ին, բեկանել է Հայաստանի եվրոպական ուղղությունը: Հայաստանը ևս երկրի ներսում հասել է որոշակի ցանկալի արդյունքների. այսօր Հայաստանում իշխանության ռեժիմի համար որևէ լուրջ վտանգ չկա, և առաջ մղել Հայաստանի անդամակցությունը ՄՄ-ին և ԵվրԱզԷՍ-ին՝ Մոսկվայի համար նշանակում է հակամարտությունների մեջ մտնել և տարաձայնություններ ունենալ Մինսկի ու Աստանայի հետ, որը նա այսօր ամենևին էլ չի ցանկանում:
Այսօր Մոսկվան չէր ցանկանա ապաբևեռացնել իրավիճակը: Շատ ավելի կարևոր է ցանկացած գնով ստորագրել նախատեսվող փաստաթուղթը, քանի որ այդ փաստաթղթի չստորագրությունը կամ այդ ճանապարհին որոշակի խոչընդոտները աղմկահարույց անհաջողություն կլինեն: Ուստի Մոսկվայի համար ավանդական կազմով ստորագրելն առաջնահերթություն է»,- մեկնաբանեց փորձագետը՝ հավելելով, որ Հայաստանի հետ բավականին թույլ աշխատանք է լինելու:
Նրա համոզմամբ՝ շատ բան էլ կախված է լինելու հետագա զարգացումներից: Սակայն ռուսաստանցի վերլուծաբանը չի բացառում, որ որոշ ժամանակ անց Հայաստանը կմիանա ԵվրԱզԷՍ-ին, բայց դա պրակտիկ նշանակություն չի ունենալու, քանի որ նախագիծը բացարձակ քաղաքական, է և եթե լինեն փոխադարձ բոնուսներ, և եթե Ռուսաստանի համար լուրջ կորուստներ չլինեն, ապա Հայաստանը ձևականորրեն կմիանա:
Անդրադառնալով ՀՀ վարչապետ Հովիկ Աբրահամյանի՝ ՀՀ-ի ու ԼՂ-ի անբաժանելիության մասին դիտարկումներին՝ քաղաքագետն ասաց, որ նման մակարդակի հայտարարությունները առնվազն համաձայնեցված են Մոսկվայի հետ: Սակայն, ըստ նրա, դա բանակցային դիրքորոշում է, որի հայտը ներկայացվել է մի հարցի քննարկման մեկնարկին, որն անհրաժեշտ չի լինի մոտ ապագայում քննարկել:
