«Բարգավաճ Հայաստան» կուսակցության նախագահ Գագիկ Ծառուկյանը հանդիպել է սիրված երգիչ, երգահան Ռուբեն Հախվերդյանի հետ:
Ծավալված ջերմ ու անկաշկանդ զրույցի ընթացքում ԲՀԿ նախագահը նշել է, որ մշտապես հետևում է արվեստագետի գործունեությանն ու բարձր է գնահատում նրա վաստակը:
Գագիկ Ծառուկյանը ցանկություն է հայտնել աջակցության իր մասնաբաժինն ունենալ սիրված երգահանի հին ու նոր երգերի ձայնագրության գործում:
«Յուրաքանչյուր ազգ ուժեղ է իր պատմությունով ու մշակութային հարուստ ժառանգությամբ, ուստի այն պահպանելու և սերունդներին փոխանցելու պատասխանատու գործում պետք է իր մասնաբաժինն ունենան բոլորը: Յուրաքանչյուր մարդ պետք է զգա, որ իր աշխատանքը գնահատվում է»,-իր խոսքում նշել է Գագիկ Ծառուկյանը՝ հավելելով, որ ոլորտի հանդեպ ուշադրությունը շարունակական է լինելու:
Ռուբեն Հախվերդյանը նշել է, որ Գագիկ Ծառուկյանի ջերմ խոսքերից տպավորված է և պատասխանատվության զգացումն ավելի է մեծանում: Սիրված երգիչը լավ գիտի, թե Գագիկ Ծառուկյանը որքան մարդկանց է օգնության ձեռք մեկնել ու ինչպիսի ակտիվ մասնակցություն է ունեցել բազմաթիվ նախաձեռնությունների իրականացման ճանապարհին:
Արվեստագետի կողմից բարձրաձայնված առաջնահերթ լուծում պահանջող խնդիրները ԲՀԿ նախագահի կողմից հենց տեղում դրական արձագանքի արժանացան:
