Թեհրանի միջուկային ծրագրի հարցով ապագա բազմակողմանի համաձայնության տեքստի վրա աշխատանքն ամիսներ կտևի: Այսպիսի կարծիք է հայտնել ԵՄ արտաքին և անվտանգության քաղաքականության հարցերով գերագույն ներկայացուցիչ Քեթրին Էշթոնի մամլո քարտուղար Մայքլ Մանը, հայտնում է ITAR-TASS-ը:
«Մենք առաջիկա ամիսներին և շաբաթներին դեռ շատ աշխատանք ունենք անելու, բայց ԵՄ գերագույն ներկայացուցչի դիրքորոշումը մնում է անփոփոխ՝ հասնել համաձայնության, որը կբավարարի բոլոր կողմերին և կվերացնի Իրանի միջուկային ծրագրի խաղաղ բնույթի վերաբերյալ միջազգային հանրության անհանգստությունը»,- ասել է նա լրագրողներին Բրյուսելում:
Ինչպես ավելի վաղ էր հաղորդվում՝ Իրանի միջուկային ծրագրի հարցով Իրանի և միջազգային միջնորդների «վեցյակի» բանակցությունների հաջորդ փուլը տեղի կունենա հունիսի 16-20-ը Վիեննայում:
Անցած ուրբաթ Վիեննայում ավարտվել է Իրանի և «վեցյակի» բանակցությունների հերթական փուլը, որը ոչ մի զգալի արդյունք չի տվել: