Այսօր Շվեյցարիայում կանցկացվի համազգային հանրաքվե, որի ընթացքում, այլ հարցերի հետ միասին, քվեարկության կդրվի նվազագույն աշխատավարձ սահմանելու հարցը:
Նվազագույն աշխատավարձ սահմանելու նախաձեռնությամբ առաջին անգամ հանդես է եկել «Շվեյցարական արհմիությունների միավորումը» (USS): Մեկ ժամվա աշխատանքի դիմաց նվազագույն վարձատրությունը ծրագրվում է դարձնել 22 ֆրանկ (25 դոլար), ինչը նշանակում է, որ ամսական աշխատավարձը կկազմի 4000 ֆրանկ (4500 դոլար):
Եթե Շվեյցարիայի քաղաքացիները աջակցեն այդ նախաձեռությանը, ապա նվազագույն աշխատավարձը այս երկրի տարածքում կլինի ամեաբարձրը ամբողջ աշխարհում: Համեմատության համար նշենք, որ Եվրոպայի ամենախոշոր տնտեսություն ունեցող երկրում՝ Գերմանիայում, մեկժամյա աշխատանքի նվազագույն աշխատավարձը կազմում է 8.5 եվրո, իսկ Բարաք Օբաման ցանկանում է հասնել ԱՄՆ-ում մեկժամյա աշխատանքի դիմաց 11.1 դոլար նվազագույն աշխատավարձի:
Ըստ արհիմությունների հաշվարկների՝ այդ նախաձեռնության դեմ հանդես է եկել փոքր և մասնավոր բիզնեսը, որն ապահովում է երկրի աշխատատեղերի 2/3-ը:
Հասարակական կարծիքի հարցման արդյունքներով՝ շվեյցարացիների 64%-ը կքվեարկի նվազագույն աշատավարձի սահմանման դեմ:
