Քաղաքականությունն ամենաբարդ, ամենաայլանդակ, բայց նաև ամենակարևոր բնագավառներից է: Քաղաքականությունը ոչ պոեզիա է, ոչ էլ բանաստեղծություն: Քաղաքականության մեջ միշտ ռեալիզմը հաղթում է ռոմանտիզմին: «Առաջին լրատվական»-ի հետ զրույցում այս մասին ասաց ՀԱԿ-ի մաս կազմող «Հայրենիք և պատիվ» կուսակցության փոխնախագահ Վարդան Մալխասյանը՝ անդրադառնալով երեկ «Կենտրոն» հեռուստաընկերության եթերում ՀԱԿ առաջնորդ Լևոն Տեր-Պետրոսյանի մամուլի խոսնակ Արման Մուսինյանի այն հայտարարությանը, թե ՀԱԿ քաղխորհուրդը օգոստոսին կայացրել է որոշում ԲՀԿ-ի հետ գործակցության վերաբերյալ:
Վարդան Մալխասյանը նշեց, որ իրենց առջև խնդիր է դրված Հանրապետական կուսակցությանը մաքրել ասպարեզից, որը հանդես է գալիս որպես անզուսպ, վայրենի ուժ: Նրա համոզմամբ՝ քաղաքական դաշտն այնքան է փչացել, որ որևէ քաղաքական ուժ ի զորու չէ միայնակ պայքարել գործող ուժի դեմ:
«Ես այն կարծիքին եմ, որ ԲՀԿ-ն, իշխանական կոալիցիայի մաս կազմելով, շատ սխալներ է գործել և դրանց պատասխանը պետք է տա: Քաղաքականության մեջ չշտապող ուժը հաղթում է վայրենի ուժին: Եթե առողջ մտածող մարդիկ ուզում են դարձի գալ, թող դարձի գան: Ես վստահում եմ Լևոն Տեր-Պետրոսյանի լայնախոհությանը»,- տեսակետ հայտնեց Վարդան Մալխասյանը՝ ընդգծելով, որ միշտ ռադիկալ լուծումների կողմնակից է:
Հիշեցրինք, որ «Հայրենիք ու պատիվ» կուսակցության ղեկավար Գառնիկ Մարգարյանն ասել է, թե ՀԱԿ-ԲՀԿ համագործակցության դեպքում ՀԱԿ-ում իրենք անելիք չունեն, ուստի քաղխորհուրդը որոշում կկայացնի: Հարցին` եթե որոշում կայացվի լքել ՀԱԿ-ը, ՀԱԿ-ի հե՞տ կմնա, թե՞ կուսակցության, Վ. Մալխասյանը պատասխանեց, որ քաղխորհրդի նիստին քաղխորհրդի ներկայացուցիչներն իրենց կարծիքներն ենք հայտնում, քննարկում. «Երբ լինի որոշում, կհայտնեմ իմ դիրքորոշումը, բայց առայժմ վստահում եմ Լևոն Տեր-Պետրոսյանի լայնախոհությանը»:
Նշենք, որ ավելի վաղ «Առաջին լրատվական»-ի հետ զրույցում «Հայրենիք ու պատիվ» կուսակցության ղեկավար Գառնիկ Մարգարյանն ասել էր, որ ՀԱԿ-ԲՀԿ համագործակցության մասին ՀԱԿ որոշման դեպքում իր ղեկավարած կուսակցությունը ՀԱԿ-ում անելիք չունի: «Եթե Լևոն Տեր-Պետրոսյանը հաշվի չի նստում մեզ հետ, մենք էլ իր հետ չենք նստի»,- ասել էր նա՝ հավելելով, որ այդ դեպքում կուսակցության քաղխորհուրդը նիստ կանցկացնի և որոշում կկայացնի:
Հիշեցնենք նաև, որ «Լրագիր» լրատվական վերլուծական կայքը գրում է, որ հոկտեմբերի 31-ին «Կենտրոն» հեռուստաընկերության հյուր, Հայ ազգային կոնգրեսի առաջնորդ Լևոն Տեր-Պետրոսյանի մամուլի խոսնակ Արման Մուսինյանը հայտարարել է, որ Կոնգրեսում կան ԲՀԿ-ի հետ գործակցելու վերաբերյալ տարբեր կարծիքներ, բայց Կոնգրեսի քաղխորհուրդը օգոստոսին կայացրել է որոշում և ընդունել Լևոն Տեր-Պետրոսյանի կարծիքը` ԲՀԿ-ի հետ գործակցելու մասին:
