Նիկոլաևսկի մարզի Պերվոմայսկի շրջանային ընտրական հանձնաժողովի շենքի առաջ բախումներ են տեղի ունեցել ուկրաինական ընդդիմության և հատուկջոկատայինների միջև: Այս մասին հաղորդում է ITAR-TASS-ը:
Մի քանի տասնյակ ընդդիմադիրներ, որոնք հավաքվել են ընտրական տեղամասի մոտ, թույլ չեն տվել «Բերկուտ» ստորաբաժանման մարտիկներին վերցնել քվեարկության արձանագրությունները՝ ձայները վերահաշվարկելու համար:
Շենք մտնելու ու քվեատուփերը դուրս բերելու համար հատուկջոկատայինները կիրառել են արցունքաբեր գազ ու մահակներ` հայտնել է ընդդիմադիրներից Նազար Պերվակը:
«Երեք քաղաքացի, որոնք խոչընդոտել են քվեարթերթիկների դուրսբերմանը, բախման ժամանակ տուժել են՝ նրանց աչքերի տակ կան կապտուկներ, պատռել են նրանց հագուստը: Շտապօգնության բժիշկները, որոնք ժամանել են դեպքի վայր, չեն կարողացել մտնել շինություն և ցուցաբերել առաջին բուժօգնություն»,- պատմել է Պերվակը:
Սակայն «Բերկուտ»-ին այդպես էլ չի հաջողվել դուրս բերել արձանագրությունները, քանի որ ընդդիմությունը բեռնատարներով փակել է քաղաքի բոլոր ճանապարհները, նաև` Նիկոլաև-Կիև մայրուղին:
Դրանից հետո հայց է ներկայացվել դատարան: Դատը նշանակված է այսօր` Մոսկվայի ժամանակով ժ. 13.00-ին:
Երկու օր առաջ 132-րդ ընտրատարածքում մեծամասնական ընտրակարգով հաղթող էր հայտարարվել ընդդիմության թեկնածու Արկադի Կորնացկին, սակայն ավելի ուշ ԿԸՀ-ում թվերը փոխվել են՝ պարտված կոմունիստ թեկնածուի ձայներն անցել են Ռեգիոնների կուսակցության անդամ Վիտալի Տրավայանկոյին, ինչից հետո նա դուրս է եկել առաջին հորիզոնական:
Ուկրաինայի ԿԸՀ-ն արդեն 2 օր է` չի կարողանում ավարտել Գերագույն ռադայի ընտրություններում ձայների հաշվարկը:
