ԲՀԿ առաջնորդ Գագիկ Ծառուկյանը երեկ հայտարարել է, որ ԲՀԿ համագումարում իր հնչեցրած դրույթներն ուժի մեջ են, և բացառվում է կուրսից որևէ շեղում, իր հեղինակության և կուսակցության հեղինակության հաշվին հետքայլ:
Ըստ էության, պարզվում է, որ ԲՀԿ-ականները ՀՀԿ-ական Գալուստ Սահակյանի օգտին քվեարկել են համագումարյան կուրսի շրջանակներում՝ կուսակցության և նրա առաջնորդի պատիվը բարձր պահելու համար: Գագիկ Ծառուկյանի այդ հայտարարությունը, ամենայն հավանականությամբ, հենց Գալուստ Սահակյանի, այսպես կոչված, ընտրությամբ է պայմանավորված կամ ավելի ճիշտ՝ դրանում ԲՀԿ դերակատարմամբ, որը մեծ աղմուկ է առաջացրել հասարակական-քաղաքական դաշտում՝ ըստ էության անհարմար դրության մեջ դնելով ոչ միայն ԲՀԿ-ին, այլ նաև նրա մասնաճյուղի վերածված ՀԱԿ-ին:
Եվ հիմա Գագիկ Ծառուկյանը, ըստ երևույթին, փորձում է, այսպես ասած, տեղը բերել բոլորի «ոգին»՝ հայտարարելով, որ ոչ մի բան չի փոխվել, կուրսը անշեղ է, իսկ հաջորդ ընտրությունները շրջանցելու են Մելիք-Ադամյան փողոցը: Սա էլ պատասխանն էր Էդուարդ Շարմազանովին:
Ինքնին այն, որ Շարմազանովին պատասխանում է Ծառուկյանը, արդեն կարծես թե խոսում է որոշակի խուճապի մասին: Այսինքն՝ Գալուստի քվեարկությունը և դրան հաջորդած շարմազանովյան հայտարարությունները ԲՀԿ-ում և նրա մասնաճյուղերում, ամենայն հավանականությամբ, մեծ տարակույսների տեղիք են տվել, որոնք ցրելու համար էլ հարկ է եղել Գագիկ Ծառուկյանի հայտարարության, քանի որ Ծառուկյանից ցածր հայտարարությունները ի զորու չէին լինի ցրել խուճապը, եթե, իհարկե, Ծառուկյանի հայտարարությունները ի զորու լինեն խուճապը ցրել:
Խնդիրը, ըստ էության, ոչ միայն խուճապն է, այլ նաև «հեղինակությունը», որովհետև շատերի համար էր ուղղակի անհարմար բան ստացվել Գալուստի քվեարկությունից հետո: Վերջիվերջո՝ Ծառուկյանի հայտարարությունները, ըստ էության, ցիկլ են հիշեցնում. ԲՀԿ-ն մեկ հանդես է գալիս խրոխտ ընդդիմադիր հայտարարություններով, հետո գնում և կոալիցիոն հուշագիր ստորագրում ՀՀԿ-ի հետ, հետո հանդես է գալիս խրոխտ ընդդիմադիր հայտարարություններով, սակայն որևէ կերպ չի փորձում բողոքարկել խորհրդարանական ընտրություններում ՀՀԿ-ի բացարձակ հաղթանակը, այնուհետև Երևանում Տարոն Մարգարյանի հաղթանակը:
ԲՀԿ-ն հանդես է գալիս խրոխտ ընդդիմադիր հայտարարություններով, իսկ Երևանի ավագանիում քվեարկում է ՀՀԿ-ական Տարոն Մարգարյանի գրեթե բոլոր որոշումների օգտին: ԲՀԿ-ն հանդես է գալիս խրոխտ հայտարարություններով և Գագիկ Ծառուկյանին ներկայացնում ամենահեղինակավոր առաջնորդ ու նախագահության թեկնածու, սակայն այդպես էլ նրա թեկնածությունը չի դնում, և կանաչ լույս է վառում Սերժ Սարգսյանի առաջ: ԲՀԿ-ն հանդես է գալիս խրոխտ ընդդիմադիր հայտարարություններով, սակայն քվեարկում է ԱԺ նախագահի պաշտոնում ՀՀԿ-ականի, այն էլ՝ ինչ ՀՀԿ-ականի օգտին: ԲՀԿ-ն հանդես է գալիս խրոխտ ընդդիմադիր հայտարարություններով, իսկ նրա առաջնորդի ղեկավարած Օլիմպիական կոմիտեի չինովնիկը հայտնվում է նախարարությունում, և ԲՀԿ-ն էլ հայտարարում է, թե դա նրա անձնական կյանքն է:
Ամենայն հավանականությամբ, հենց այս ամբողջական ցիկլն է կուսակցության այն կուրսը, որից էլ չեն շեղվում: Եվ այս կուրսը այն կուրսն է, որը Մելիք-Ադամյանն իսկապես շրջանցում է, այսինքն՝ հասարակությանն է շրջանցում Մելիք-Ադամյանից և պահում իր տիրույթում, որպեսզի Մելիք-Ադամյանում հանգիստ վերարտադրվեն: