Օրեր առաջ Բեյրութից Հալեպ ուղևորվող քաղաքացիական ավտոբուսից առևանգված 7 հայերին ազատ արձակելու նպատակով սիրիական իշխանությունը և հայ համայնքը բանակցում են ընդդիմադիր կողմի հետ: Այս մասին «Առաջին լրատվական»-ի հետ զրույցում ասաց Հալեպի Հայ ավետարանական համայնքի համայնքապետ, վերապատվելի Հարություն Սելիմյանը:
Նա տեղեկացրեց, որ առևանգողները ընդդիմության միայն մեկ կողմը չեն ներկայացնում. «Կան այնպիսիք, որոնք տոլերանտ են, կան և այնպիսիք, որոնք ծայրահեղ իսլամականներ են: Աշխատում ենք նրանց հետ լեզու գտնել, որ հայերը կարողանան ազատ արձակվել: Տակավին արդյունք չկա, բայց առաջիկա օրերին հույս ունենք, որ նրանք կլինեն ազատության մեջ»:
Սելիմյանի հավաստիացմամբ՝ փորձում են ընդդիմադիրներին բացատրել, որ քրիստոնյաները Սիրիայում վտանգ չեն ներկայացնում իրենց համար, և նրանք պետք է ավելի խոհեմաբար մոտենան այս հարցին և ազատ արձակեն առևանգվածներին:
Հիշեցնենք, որ հոկտեմբերի 29-ին Սիրիայում զինյալ ընդդիմադիրները կանգնեցրել էին Բեյրութից Հալեպ ուղևորվող քաղաքացիական ավտոբուսը և առևանգել 10 մարդու։ Նրանցից 7-ը հայեր են, իսկ երեքը՝ արաբ քրիստոնյաներ: Հայտնի են հայ առևանգվածներից 5-ի անունները՝ Կարո Փամփալյան, Արսեն Արոյան, Լևոն Զեյթունյան, Բաշար Ռաբաթ և Ժորժ Ռաբաթ:
