ԱՄՆ պետդեպարտամենտի զեկույցում, որպես ահաբեկչությանը աջակցող գլխավոր պետություն, հերթական անգամ հիշատակվում է Իրանը, որը Միացյալ Նահանգների կողմից որպես այդպիսին է ճանաչվել դեռ 1984 թվականին։
Իրանը հերքել է Վաշինգտոնի մեղադրանքները ահաբեկչությանը հանցակցության մասին, որոնք պարունակվում են ԱՄՆ պետդեպարտամենտի տարածած զեկույցում, տեղեկացնում է իրանյան IRNA գործակալությունը՝ հղում անելով երկրի ԱԳՆ պաշտոնական ներկայացուցիչ Մարզիյե Աֆհամին։
Իրանյան կողմը ամերիկյան իշխանությունների նման գործողությունները համարում է երկակի ստանդարտների քաղաքականության կիրառման հետևանք, ինչը «սպառնալիք է խաղաղությանը և միջազգային անվտանգությանը», ասվում է հաղորդագրությունում։
ԱՄՆ պետդեպարտամենտը 2013 թ. զեկույցում, որը պարունակում է վիճակագրություն աշխարհում կատարված ահաբեկչությունների թվի վերաբերյալ, «Ալ-Քաիդան» անվանում է «թիվ 1 թշնամի»։ Սակայն միաժամանակ, որպես ահաբեկչությանը աջակցող գլխավոր պետություն, հերթական անգամ հիշատակվում է Իրանը։
Ինչպես նշվում է պետդեպարտամենտի զեկույցում, Թեհրանը «շարունակում է Գազայում աջակցել պաղեստինյան ահաբեկչական խմբավորումներին, ինչպես նաև լիբանանյան «Հըզբոլլահ» շարժմանը, մեծացրել է ներկայությունը Աֆրիկայում, ինչպես նաև փորձում է զենքի մաքսանենգություն իրականացնել Եմենի շիա «Ալ-Խութի» խմբավորման և Բահրեյնի շիա ընդդիմության համար։
