Արագածոտնի մարզի գյուղերի բնակիչները չեն հավատում, որ ՕԵԿ առաջնորդ, Ազգային անվտանգության խորհրդի արդեն նախկին նախագահ Արթուր Բաղդասարյանն իր «Հայասի Գրուպ» գործարանը վարկերով է աշխատեցնում:
Հիշեցնենք, որ նախորդ օրը՝ ասուլիսին, Արթուր Բաղդասարյանը, անդրադառնալով իրեն պատկանող բիզնեսին, ասել էր, որ ինքը վարկերով է կառուցել իր գործարանը, հիմա էլ վարկերի տակ է: Իսկ բիզնեսը՝ գործարանը, կառուցել է, քանի որ, իր խոսքով՝ չէր հարող 250 հազար դրամ աշխատավարձով ապրել:
«Սուտ ա, չեմ հավատում, ո՞վա ասում՝ վարկերովա աշխատում, վարկերով եքա գործարանը ո՞վ կկառուցի: Էդ սուտա, բա մի բան պիտի մոգոնի: Բա որ ինքնա վարկի տանք, գյուղացի՞ն ինչ ասի»,-«Առաջին լրատվական»-ի հետ զրույցում ասաց «Հայասի Գրուպ» գործարանի անմիջապես հարևանությամբ գտնվող Ոսկեվազ գյուղի բնակիչներից մեկը:
«Սուտա, ցանկացած ներկայիս պաշտոնյա ճիշտ բան չի ասում»,-իր հերթին ասաց մեկ այլ բնակիչ: Նրա խոսքով՝ Ոսկեվազ գյուղից շատ մարդիկ են աշխատում Բաղդասարյանի գործարանում, բայց ամիսներով աշխատավարձ չեն ստանում.«Ամիսներով աշխատավարձ չենք ստանում, հլը դեկտեմբեր ամսվա աշխատավարձը չենք ստացել, բայց արդեն ամառա: Բայց ստիպված շարունակում ենք աշխատել, քանի որ այլ տարբերակ չունենք, ուրիշ տեղ աշխատանք չկա»:
Մեր զրուցակիցների խոսքով՝ աշխատավարձն էլ առանձնապես բարձր չէ՝ 50-60-70 հազար դրամ, այն էլ՝ 12 ժամվա աշխատանքի դիմաց:
Նույն վիճակը նաև կողքի գյուղում էր՝ Ագարակում: Այս գյուղի բնակիչները, սակայն, չցանկացան տեսախցիկի առաջ խոսել: Վախենում ենք՝ ասացին: Բայց տեսախցիկից այն կողմ խոստովանում էին, որ ամիսներով աշխատավարձ չեն ստացել, բայց ուրիշ տարբերակ էլ չունեն:
Որոշ բնակիչներ էլ, թերևս կրկին վախի պատճառով, տեսախցիկի առաջ կեղծելով ասում էին, որ իրենք կանոնավոր ստանում են իրենց աշխատավարձը, բայց անգամ իրենց ծիծաղն էր գալիս իրենց ասածի վրա: Ընդհանուր առմամբ մեր շրջած գյուղերումտիրումէրվախի մթնոլորտ, մարդիկ իրենց բողոքը, դժգոհությունը միայն տեսախցիկից այն կողմ էին արտահայտում, իսկ շատերը միայն տեսախցիկը տեսնելով՝ արագ մտնում էին տուն և հրաժարվում որևէ հարցի պատասխանել:
