Լիբիական ընդդիմությունը ճանաչել է պարտությունը Ռաս Լանուֆ քաղաքում: Այս մասին հայտարարել է ընդդիմության ներկայացուցիչ, գեներալ Աբդ Ալ-Ֆատահ Յունուսը: Նա մասնավորապես նշել է, որ Քադաֆիի զորքերը գրավել են ինչպես քաղաքը, այնպես էլ նավթավերամշակման գործարանը: Այս մասին հաղորդում է Associated Press գործակալությունը:
Աբդ Ալ-Ֆատահ Յունուսը միաժամանակ ավելացրել է, որ ընդդիմադիր ուժերը պատրաստվում են մեկ օրվա ընթացքում հակագրոհ կազմակերպել Ռաս Լանուֆում: Հավանաբար նոր գործողությունները կսկսվեն մարտի 13-ին:
Հիշեցնենք, որ վերջին օրերին Քադաֆիի կողմնակիցները մեկը մյուսի հետևից գրավում են ընդդիմության վերահսկողության տակ գտնվող քաղաքները: Մասնագետները նշում են, որ Ռաս Լանուֆի անկումը բավականին թուլացնում է ընդդիմության դիրքերը, քանի որ այդտեղից ուղիղ ճանապարհ է բացվում դեպի կես միլիոն բնակչություն ունեցող Բենղազի քաղաք, որը համարվում է ընդդիմության կենտրոնատեղին: Այստեղ է գտնվում ընդդիմության կողմից ձևավորված ժամանակավոր կառավարությունը, որը եվրոպական պետությունների կողմից ճանաչվել է որպես միակ լեգիտիմ ուժ, որի հետ Արևմուտքը պատրաստվում է քննարկել Լիբիայում հետագա զարգացումները: