Եվրոպայի մի շարք տարածաշրջաններում անդրսահմանային համագործակցության բազմաթիվ օրինակներ կան: 100-ից ավելի, այսպես կոչված, եվրառեգիոններ են ձևավորվել, որոնց շրջանակներում տարբեր երկրների սահմանամերձ տարածաշրջաններ համագործակցում են միմյանց հետ. անդրսահմանային համագործակցության հիմնական նպատակներն են՝ սահմանամերձ տարածքներում կենսամակարդակի աճը, միասնական տնտեսական և մշակութային միջավայրի զարգացումը, բնակչության զբաղվածության ապահովումը, սահմանային արգելքների վերացումը:
Այսօր Վանաձորի «Արգիշտի» հյուրանոցում դրվեց Կովկասում առաջին և դեռ միակ եվրառեգիոնի՝ «ԵվրաԿովկասի» հիմքը: Առաջին եվրառեգիոնը ձևավորվել է հայ-վրացական սահմանում՝ ընդգրկելով հայկական 5 համայնքներ՝ Ալավերդի, Տաշիր, Վանաձոր, Դիլիջան, Իջևան և վրացական չորս շրջան` Նինոծմինդա, Դմանիսի, Բոլնիսի և Մառնեուլի:
Հայաստանի համայնքների ասոցիացիայի և Վրաստանի տեղական իշխանությունների ասոցիացիայի համատեղ նախաձեռնությանն աջակցել է Գերմանիայի Էկոնոմիկայի ֆեդերալ նախարարության TRANSFORM ծրագիրը և KfW բանկային խումբը: Ծրագրի շրջանակներում հիմնադրված ազգային կազմակերպություններն անցած տարվա հունիսին Թբիլիսիում ստորագրել էին համաձայնագիր համագործակցության մասին, իսկ այսօր ծրագրում ընդգրկված համայնքների և կազմակերպությունների ներկայացուցիչներն ստորագրեցին առաջին պիլոտային ծրագրերի մեկնարկն ազդարարող հուշագրերը:
Հայաստանի համայնքների ասոցիացիայի վարչության համակարգող Էմին Երիցյանն «Առաջին լրատվականի» թղթակցին հայտնեց, որ մի քանի` տուրիզմին, գործարարության խթանմանը և էկոլոգիային վերաբերվող, 6-10 ամիս տևողությամբ ծրագրերը համաֆինանսավորման սկզբունքով կիրականացվեն տեղերում, իսկ ամռանը Վրաստանում տեղի կունենա մեծ հավաք, որտեղ էլ կներկայացվեն, թե ինչ է արվել, կամփոփվեն պիլոտային ծրագրերի արդյունքներն ու կքննակվեն համագործակցությունն ավելի սերտացնելու հնարավորությունները:
Ըստ մեր ունեցած տեղեկությունների` թեև եվրառեգիոնը տարածքի զարգացման գործիք է, ունի ղեկավար և եվրոպական շատ կազմակերպությունների նման մասնակից երկրները հերթով են ղեկավարում, կառույցն ստեղծելու հարցում վրացական կողմը մտավախություններ է ունեցել, որ նախաձեռնությունը միտված է հայ-վրացական սահմանի վրացական հատվածում հայկական ազդեցության մեծացմանը:
