Ադրբեջանական APA լրատվական գործակալության փոխանցմամբ` ՄԱԿ-ում Ադրբեջանի մշտական ներկայացուցչությունում ստորագրվել է «Ադրբեջանի Հանրապետության և Հարավային Սուդանի Հանրապետության միջև դիվանագիտական հարաբերությունների մասին» համատեղ պաշտոնական փաստաթուղթը:
Ադրբեջանի կառավարության անունից փաստաթուղթը ստորագրել է ՄԱԿ-ում Ադրբեջանի մշտական ներկայացուցիչ, դեսպան Ագշին Մեհթիևը, իսկ Հարավային Սուդանի կառավարության անունից` ՄԱԿ-ում մշտական ներկայացուցիչ, դեսպան Ֆրենսիս Դենգը:
Հիշեցնենք, որ Ադրբեջանը երկար ժամանակ տեղի չի տալիս Թուրքիայի գործադրած ճնշումներին` ճանաչելու համար ինքնահռչակ Հյուսիսային Կիպրոսի Թուրքական Հանրապետությունը (ՀԿԹՀ): Այդ կապակցությամբ Ադրբեջանի նախագահի աշխատակազմի հասարակական-քաղաքական բաժնի ղեկավար Ալի Հասանովը հայտարարել է, որ Ադրբեջանի կողմից ՀԿԹՀ-ի չճանաչումը պայմանավորված է Լեռնային Ղարաբաղի գործոնով.
«Միջազգային հանրությունը չի ճանաչում ԼՂՀ-ն: Եթե Բաքուն ճանաչի ՀԿԹՀ-ն, ապա դա կունենա հակադարձ էֆեկտ: Արդեն դրա հաջորդ օրը Հայաստանի դաշնակիցները կհայտարարեն ԼՂՀ-ի ճանաչման մասին: Ադրբեջանի կառավարությունը մեծ պլաններ ունի՝ կապված ՀԿԹՀ-ի հետ: Սակայն դրանց իրագործումը հնարավոր է միայն Ղարաբաղյան հակամարտության կարգավորումից հետո»:
Իսկ նախորդ տարվա հուլիսի վերջերին Ադրբեջանի փոխվարչապետ Ալի Հասանովը Բաքվում թուրք լրագրողների հետ հանդիպման ժամանակ հայտարարել էր, որ եթե Ադրբեջանը ճանաչի ՀԿԹՀ-ն, ապա միանգամից 15 պետություն կճանաչի Լեռնային Ղարաբաղը։
