Ուկրաինայի Գերագույն ռադայի ընտրությունների քարոզարշավին մնացել է մի քանի ժամ: Կուսակցությունները և ինքնառաջադրվածներն ուրբաթ օրը վերջին ելույթներն ունեցան և հիմա հաշվում են հաղթանակի իրենց հնարավորությունները: Այս ընտրությունների կարևոր նորամուծությունն այն է, որ Ռուսաստանի օրինակով բոլոր ընտրատարածքները հագեցած են վեբ-տեսախցիկներով: Ընտրությունները իրական ժամանակով համացանցով կհեռարձակվեն: Ուկրաինայի ԿԸՀ–ն համոզված է, որ դա հնարավոր խախտումներից ամենալավ պաշտպանության միջոցն է:
Ինչքան քիչ է կուսակցության հաղթանակի հնարավորությունը, այնքան տպավորիչ է նրա գովազդային քարոզարշավը: Պատգամավորի թեկնածու Օլեգ Լյաշկոն նախընտրական քարոզարշավի շրջանակներում հասցրել է հակառակորդներին եղանով սպառնալ, կով կթել և նույնիսկ Կիևում շրջել է կոկորդիլոսի հետ:
Նրանք, ովքեր այնքան էլ լավ դերասանություն չեն անում, դիմել են հայտնի աստղերի օգնությանը: Օրինակ, Ուկրաինա է ժամանել Ժան Կլոդ Վան-Դամը՝ աջակցելու իր ընկեր թեկնածուին:
Ինչևէ, մեծ նախընտրական սկանդալ այս անգամ տեղի չունեցավ, չնայած որ ընտրողներին կաշառելու մասին լուրերը ամեն օր շրջանառվում են տեղական ԶԼՄ-ներում:
Իսկ ահա Յուլյա Տիմոշենկոն իր աղջկա միջոցով կոչ է արել ընտրողներին զգոն լինել. «Եթե ուզում եք ապրել, պետք է քվեարկեք այն թեկնածուի դեմ, ով մանկական խաղահրապարակներ է կառուցում, դպրոցներ, հիվանդանոցներ է վերանորոգում ասֆալտ է փռում, անվճար դեղորայք կամ սնունդ է տալիս»,-ասում է Տիմոշենկոյի առջիկը՝ Եվգենիա Տիմոշենկոն:
«Մեր խորհրդարանում կա 450 պատգամավոր. 50 %-ն ընտրված համամասնական, 50 %-ը՝ մեծամասնական կարգով: Կարծում եմ, որ մենք կհավաքենք 230-240 ձայն, ինչը մեզ հնարավորություն կտա մեծամասնություն կազմել»,- ասել է «Շրջանների կուսակցություններ»-ի փոխնախագահ, Ուկրաինայի փոխվարչապետ Սերգեյ Տիգիպկոն:
Հավանական է, որ խորհրդարան կանցնեն նաև կոմունիստները: Ինչևէ, Ուկրաինայում այս պահին ռեյտինգներ հրապարակելն արգելված է օրենքով, չնայած որ նախկինում փորձագետներն այդ հնարավորությունը չէին բացառում: Ավելի կարևոր է, որ ոչ ոք չվիճարկի հենց այս ընտրությունները, որովհետև հակառակ դեպքում Ուկրաինայում տնտեսական անկայունության պայմաններում քաղաքական ճգնաժամ կսկսվի։
