«Բարգավաճ Հայաստան» կուսակցությունը շտապեց հերքել այդ կուսակցության խորհրդարանական խմբակցության քարտուղար Նաիրա Զոհրաբյանի հայտարարությունը նախագահական ընտրություններում Գագիկ Ծառուկյանի թեկնածության առաջադրման մասին: ԲՀԿ նախագահի մամուլի խոսնակը հայտարարել էր, որ դա Նաիրա Զոհրաբյանի անձնական կարծիքն է, իսկ ԲՀԿ որոշում չկա: Հետո Նաիրա Զոհրաբյանն էլ տարածեց հայտարարություն, որում շեշտեց, որ ինքն անձնական կարծիք է հայտնել:
«Բարգավաճ Հայաստան» կուսակցությունն ըստ էության վերածվել է անձնական կարծիքի արտահայտման կենտրոնի: Վարդան Օսկանյանն էլ ինչ ասում էր իշխանության ու Սերժ Սարգսյանի հասցեին, Գագիկ Ծառուկյանը վերագրում էր անձնական կարծիքին: Մնում է պարզել` եթե ԲՀԿ-ն նախագահի թեկնածու առաջադրի, ո՞ւմ անձնական կարծիքով է առաջնորդվելու:
Իրավիճակը լավագույնս վկայում է ԲՀԿ-ի քաղաքական անլրջության մասին, երբ բոլորը առանձին-առանձին ինչ-որ բան ասում են, սակայն կուսակցությունը պաշտոնապես անհասկանալիորեն լռում է գրեթե ամեն ինչի մասին: Վերջում կարող է պարզվել, որ ԲՀԿ-ն թեկնածու է առաջադրել, ասենք, Գագիկ Ծառուկյանին, և բոլորը առանձին-առանձին գիտեն այդ մասին, իսկ Գագիկ Ծառուկյանն, օրինակ, տեղյակ չէ:
Միգուցե արժե ԲՀԿ-ն վերանվանել և կոչել ոչ թե «Բարգավաճ Հայաստան», այլ «Բարգավաճ Անձեր» կուսակցություն: Սա զավեշտալի տեսարան կարելի էր համարել, եթե խոսքը չվերաբերեր մի քաղաքական ուժի, որը երկրորդն է իր մեծությամբ և ռեսուրսներով և նույնիսկ հավակնում է լինել առաջինը:
Նման հավակնություններ ունեցող քաղաքական ուժի լրջությունը սպառնալիք է բոլոր դեպքերում, անգամ եթե այդ հավակնությունները չբավարարվեն, և ԲՀԿ-ն մնա երկրորդը: Սակայն ընդհանրապես հարց է, թե ինչ է ԲՀԿ-ն: Եթե կուսակցության մեջ ամեն ինչ վերագրվում է անձնական կարծիքին, կնշանակի` այդ կուսակցությունը պարզապես ենթակա է տարբեր խմբերի և անձերի միջև հյուսված ինտրիգային մեծ ցանցի, որտեղ որևէ մեկը չունի կողմնորոշիչներ և հանդես է գալիս բացառապես անձնական շահերի տրամաբանության շրջանակում:
Սա էլ ավելի վտանգավոր է դարձնում կուսակցությանը, քանի որ, ըստ էության, այստեղ դրսևորվում է ԲՀԿ-ի անկառավարելիությունը, ինչը նշանակում է, որ կուսակցությունը` իր հսկայական ռեսուրսով, կարող է ենթարկվել ամենաանսպասելի մանիպուլյացիաների, ինչը, նկատի ունենալով այն մասշտաբները, որոնցով ԲՀԿ-ն տարածվել է Հայաստանում, կարող է լուրջ ազդեցություն թողնել և լուրջ վտանգներ ներկայացնել շրջակա հասարակական-քաղաքական միջավայրի համար:
Հետևաբար նման ուժը կամ պետք է չեզոքացնել ընդհանրապես, կամ պետք է լուծվի այդ ուժի կառավարելիության խնդիրը, այսինքն` որոշակիանա, թե ի վերջո` ինչ է ԲՀԿ-ն և ով է կառավարում այդ կուսակցությունը: Սա Հայաստանի ներկայիս քաղաքական կարևոր խնդիրներից մեկն է, որը պետք է լուծել, քանի դեռ ԲՀԿ-ն չի դարձել հայաստանյան դաշտում անշրջելի կոլապսների աղբյուր:
