Հարավային Կորեայում անկախ դատախազը կհարցաքննի երկրի նախագահի որդուն՝ Լի Սի Հենին, իր հոր՝ Լի Մեն Բակի համար տան շինարարության հետ կապված սկանդալի գործով: «Ես ազնվորեն կպատասխանեմ ցանկացած հարցի»,- հայտարարել է Լի Սի Հենը դատախազի հետ հանդիպումից առաջ:
Ավելի վաղ Հարավային Կորեայի դատախազությունը հայց էր ստացել Լի Մեն Բակի հակառակորդների կողմից, ըստ որի՝ նախագահի համար կառուցվող տան հողատարածքը գնվել է որդու անունով: Ընդդիմության կարծիքով՝ նախագահի աշխատակազմի ծախսերը շատ բարձր են եղել:
Դատախազության հետաքննության արդյունքում խախտումներ չեն հայտնաբերվել: Սակայն ընդդիմությունը պահանջել է լրացուցիչ հետաքննություն անցկացնել անկախ դատախազի ներգրավմամբ:
