Օրեգոնի առողջապահության և գիտությունների համալսարանի մասնագետները ստեղծել են մեկ տղամարդու և երկու կնոջ գեներով սաղմեր՝ կիրառելով ոչ միանշանակ արձագանքի արժանացած տեխնոլոգիան, որը թույլ է տալիս խուսափել ժառանգական հիվանդություններից: Այս մասին հայտնում է Yahoo! News-ը:
Այս գիտական աշխատանքի առնչությամբ արդեն էթիկային վերաբերող հարցեր են առաջացել: Երեք ծնողների հնարավորության մասին սկսել էին խոսել դեռևս 2008 թվականից: Ենթադրվում է, որ երկրորդ կնոջ ԴՆԹ-ն վերցվում է միայն առանձին արատավոր գեների փոխարինման համար, որոնք խանգարում են օրգանիզմի նորմալ կենսագործունեությանը:
Ներկայում կապիկների և մարդու ձվաբջիջների վրա փորձեր են իրականացվում: 2009 թվականին այդ գործընթացի արդյունքում լույս աշխարհ եկած կապիկները միանգամայն նորմալ են:
Նոր տեխնոլոգիայի հաստատման դեպքում, կինը կարող է երեխաներ ունենալ, որոնք կժառանգեն մոր միջուկային, այլ ոչ թե միտոխոնդրիալ ԴՆԹ-ն:
