Իրանական Mehr News լրատվական գործակալության փոխանցմամբ՝ այն բանից հետո, ինչ հուլիսի 1-ին ամբողջովին ուժի մեջ մտավ իրանական նավթի արտահանման վրա ԵՄ դրած բեռնարգելքը, Իրանի մասնավոր սեկտորը միջազգային շուկաներ է արտահանել ավելի քան 20 միլիոն բարել նավթ: Այս մասին հայտարարել է Նավթամթերքի իրանական արտահանողների միության նախագահ Հասան Խոսրոժերդին:
Վերջինիս խոսքերով՝ առաջիկա օրերին նավթի նոր խմբաքանակ կուղարկվի ասիական ու եվրոպական շուկաներ. «Իրանի նավթային սեկտորի հանդեպ ԱՄՆ-ի ու ԵՄ-ի նավթային պատժամիջոցների սահմանումից հետո Իրանի մասնավոր սեկտորն օտար գնորդներին նավթի առաջին խմբաքանակն ուղարկել է սեպտեմբերի 9-ին: Նավթը փոխադրվում է ոչ իրանական լցանավերով:
Իրանի մասնավոր սեկտորի ձեռնարկությունները մի շարք պայմանագրեր են կնքել արտասահմանում հում նավթի վաճառքի մասին: Այդ պայմանագրերը մասնավոր ընկերությունների իրանական կոնսորցիումին հնարավորություն են տալիս միջազգային շուկաներ, այդ թվում` նաև ԵՄ արտահանել իրանական նավթի 20 տոկոսը: Դա կազմում է օրական 400,000-500,000 բարել նավթ»:
Փորձագետները կարծում են, որ Իրանի մասնավոր սեկտորը կարող է լրացնել այն բացը, որն առաջացել է Իրանի նավթային սեկտորի ու Կենտրոնական բանկի դեմ միջազգային պատժամիջոցների պատճառով:
