ԱԺ գյուղատնտեսական և բնապահպանական հարցերի մշտական հանձնաժողովի նախագահի պաշտոնում այսօր ԱԺ նիստում ԲՀԿ-ն առաջարկեց Գյումրիից պատգամավոր ընտրված Մարտուն Գրիգորյանի թեկնածությունը:
ՀԱԿ պատգամավոր Նիկոլ Փաշինյանը, անդրադառնալով պատգամավորի նախկին աշխատանքային փորձին (եղել է «Տրանսակնթարթ» ընկերության հիմնադիր տնօրեն), նշեց, որ 2008-ից հետո ձևավորվել է «վատ ավանդույթ», երբ Երևան եկող երթուղիները, հատկապես հանրահավքների օրերին, շատ վատ են աշխատել:
Մ. Գրիգորյանը պատասխանեց, որ այդ օրերին՝ կիրակի-երկուշաբթի ուղևորահոսքը շատ խիտ է, իսկ երթուղայինների քանակը՝ սահմանափակ:
«Ժառանգություն» խմբակցության պատգամավոր Զարուհի Փոստանջյանը հետաքրքրվեց, թե հաննձաժողովի նախագահի պաշտոնում ընտրվելու դեպքում ինչպիսի՞ն է լինելու Գրիգորյանի դիրքորոշումը Թեղուտի հանքի հետ կապված, և արդյոք Գրիգորյանը կմիանա՞ հանքի շահագործման դեմ իր նախաձեռնությանը՝ ժամանակավոր հանձնաժողով ստեղծելուն, և հիշեցրեց ՄԱԿ տնտեսական հանձնաժողովի կողմից ընդունված 2 որոշումները, թե հանքի շահագործման որոշումները ընդունվել են միջազգային նորմերի խախտմամբ:
Մ. Գրիգորյանը պատասխանեց, թե կուսումնասիրի հարցը, հետո կորոշի՝ միանալ, թե ոչ, և միաժամանակ խոստացավ «նորմալ համագործակցել»:
