Պետական եկամուտների կոմիտեն «ստվեր» է արձանագրել բոլոր ոլորտներում: Այս մասին այսօր լրագրողների հետ ճեպազրույցում ասաց ՊԵԿ նախագահ Գագիկ Խաչատրյանը:
Հարցին` ո՞ր ոլորտներում է առավել ընդգծված «ստվեր»-ը, Գագիկ Խաչատրյանը հստակ պատասխան չտվեց: Նա նշեց, որ ներկայումս առողջապահության ոլորտի 99 հիմնարկներում կատարվում են չափագրումներ, 6-7-ում՝ ստուգումներ: «Էդ նյութերն ուղարկում ենք առողջապահության նախարարություն և կառավարություն: Մենք ուժեղացնում ենք ինստիտուցիոնալ վարչարարությունը: Երբ ստուգումներն ավարտենք, մենք լրատվամիջոցներով կհրապարակենք, նաև առողջապահության նախարարությունն ու կառավարությունը կհրապարակեն»,- ասաց նա:
Ի պատասխան հարցի, թե` հաջողվո՞ւմ է ամբողջովին հարկման դաշտ բերել օլիգարխներին, ՊԵԿ նախագահը նախ նշեց, որ շատ հետաքրքիր և լավ բառ է «օլիգարխ» բառը: Այնուհետև հավելեց. «Որ դուք ասում եք, հրապարակում եք, մենք շատ հաճախ անտարբեր ենք, կասե՞ք` ո՞ր օլիգարխներն են: Եկեք, նայեք խոշորների ցանկը, տեսեք` ինչ հարկային վճարումներ են կատարում»:
Երբ լրագրողները խնդրեցին անուններ նշել, թե, օրինակ, որ օլիգարխն է ամբողջովին կատարում հարկային պարտավորությունները, Գագիկ Խաչատրյանն ասաց. «Ես չգիտեմ, դուք նշեք»:
Լուսանկարը՝ PanARMENIAN Photo-ի
