Սիրիական հակակառավարական զինված խմբավորումները կստեղծեն միասնական ղեկավարություն` նախագահ Բաշար Ասադի ուժերի դեմ պայքարելու համար: Այս մասին գրում է Reuters գործակալությունը` վկայակոչելով գրոհայինների շրջանում գտնվող աղբյուրին:
Գործակալության զրուցակցի խոսքերով` արտասահմանյան կոորդինատորների ճնշման ներքո գրոհայինների տարանջատված խմբավորումները, այդ թվում՝ Սիրիական ազատ բանակը, համաձայնության են եկել միավորման շուրջ:
«Համաձայնությունը ձեռք է բերվել, այժմ նրանք պետք է միայն ստորագրեն այն: Օտարերկրյա օգնականներն ասել են մեզ. «Վերանայե՛ք ձեր ուժերը և միավորվեք: Մեզ անհրաժեշտ է աշխատել վստահության արժանի կողմի հետ, որպեսզի ձեզ տրամադրենք որակյալ զենք»»,- փոխանցել է գործակալության զրուցակիցը:
