«ՀԱԿ-ում պառակտումներ չկան, պարզապես որոշ հարցերում հակասություններ կան»,- այսօր լրագրողների հետ հանդիպմանը հայտարարեց ՀԱԿ համակարգող Լևոն Զուրաբյանը:
Անդրադառնալով իր և Նիկոլ Փաշինյանի միջև ծագած հակասությունների վերաբերյալ խոսակցություններին՝ Լևոն Զուրաբյանը նշեց. «Ես չգիտեմ մեր շտաբից երկու անդամի, որոնք այս հինգ տարիներին իրար հետ հակասություն չեն ունեցել այս կամ այն հարցում: Ես շատ մեծ հակասություններ եմ ունեցել Ավետիս Ավագյանի, Դավիթ Մաթևոսյանի, Մանուշակ Պետրոսյանի, Գագիկ Ջհանգիրյանի հետ, ով սարսափ` անգամ Լևոն Տեր-Պետրոսյանի հետ: Բայց հակասությունները շարժիչ ուժ են. եթե հակասություններ չլինեին, մենք առաջ չէինք գնա»,- ասաց նա:
Զուրաբյանը նշեց, որ տարբեր հարցերում ունենալով հակասություններ՝ իրենք պահպանում են ընկերական փայլուն հարաբերություններ, գործում է փայլուն թիմային մթնոլորտ: Դա, ըստ նրա, նշանակում է, որ ներսում կարելի է ունենալ հակասություն ցանկացած հարցում, կոկորդներ կրծել, բայց դրսում ներկայանալ որպես միասնական թիմ: Իսկ թե որ հարցերի շուրջ են առաջացել հակասությունները` Լևոն Զուրաբյանը չմանրամասնեց` նշելով միայն, որ դրանք նախագահական ընտրություններին չէին վերաբերում:
Լուսանկարը՝ PanARMENIAN Photo-ի
