ՀՀ զինված ուժերի մարտական պատրաստության վարչության պետ, գեներալ-մայոր Իշխան Մաթևոսյանի խոսքով`ՀՀ ԶՈւ-ն այս տարվա ընթացքում խոշորագույն քաղաքական, ռազմական կարևորություն ունեցող միջոցառումներ է իրականացրել:
Աշխատանքը, ըստ նրա, առանձնանում է նրանով, որ հագեցած միջոցառումներ են իրականացվել: Նա մասնավորապես առանձնացրեց ՀՀ տարածքում ՀԱՊԿ մասնակից պետությունների զորավարժություններն ու վերջերս ավարտված հրամանատարաշտաբային զորավարժությունները: Ըստ նրա`ՀՀ զինված ուժերի մարտական պատրաստության և մարտունակության բարձրացման գործընթացն ընդհանուր պլանի շրջանակներում է առաջ գնում:
«Ավագ զինծառայողի կարելի է պատրաստել, բայց զորավարժությունն ամենաբարձր և կատարյալ ձևն է: Մեր Զինված ուժերը մեկ աստիճանով այս ընթացքում բարձրացան, բայց սա դեռ գագաթնակետը չէ»,- ասաց նա:
Խոսելով ՀԱՊԿ-ի զորավարժությունների մասին` նա ընդգծեց, որ սա առաջին զորավարժությունն էր, որն անցկացվեց ՀՀ տարածքում, և որում ընդգրկված էին այլ մասնակից պետություններ նույնպես: Նման զորավարժություններ մենք դեռևս չունեինք:
Նրա խոսքով` առանձնահատկությունն այն էր, որ դրանք կրում էին կոալիցիոն և համատեղ զորավարժության բնույթ: Կատարվել է բավականին ծավալուն աշխատանք բոլոր ուղղություններով, բոլորը, ըստ նրա, իրենց գործառույթները գերազանց կատարեցին, փայլուն արդյունք արձանագրեցին:
ՀՀ ԶՈւ ԳՇ օպերատիվ վարչության պետ, գեներալ-մայոր Արտակ Դավթյանը, անդրադառնալով հոկտեմբերի 1- 14-ը անցկացված զորավարժություններին, ասաց, որ այն ընթացել է պլանային կարգով` առանց լուրջ դեպքերի, ընդգրկված է եղել ՀՀ ԶՈւ-ի հիմնական մասը: Անձնակազմը 45.000-անոց էր, իսկ միավոր տեխնիկան` 5000: Ընդգրկվել էին նաև նորագույն հակատանկային միավորումներ:
Զորավարժությունները, նրա խոսքով, որևէ քաղաքական ենթատեքստ չունեն, դրանք հետապնդում են զորքերի պատրաստության նպատակ:
Նա նշեց, որ պլանային կարգով իրականացվում է հին տեխնիկայի փոխարինումը նորի, բացի այդ` ուշադիր հետևում են հակառակորդի օգտագործած տեխնիկային և զորավարժություններին, և դրան համարժեք միջոցներ են կիրառվում:
