Թուրքիայի դիվանագիտության բարձրաստիճան ներկայացուցիչն առաջին անգամ ընդունել է Հայոց ցեղասպանությունը: Այսօր լրագրողների հետ հանդիպմանը այս մասին հայտնեց Եվրոպայի հայկական միությունների ֆորումի (ԵՀՄՖ) նախագահ Աշոտ Գրիգորյանը: Նա պարզաբանեց, որ այս տարվա հուլիսին քրեական հայց էր ներկայացրել Սլովակիայի դատախազություն՝ ընդդեմ Սլովակիայում Թուրքիայի դեսպան տիկին Գյուլհան Ուլութեքինի, ով փորձել է Հայոց ցեղասպանության փաստը մերժել Սլովակիայում:
Դեսպանուհին «Հայերը, Միկլոշկոն և Հարաբինը» հոդվածում հայտարարել էր, որ «1915թ.-ի դեպքերը ցեղասպանություն հայտարարելը լուրջ և միաժամանակ կասկածելի քայլ է, այն ժամանակ ավելի շատ թուրքեր են զոհվել: Դեսպանուհու նկատմամբ քր.գործ է հարուցվել Սլովակիայի ՔՕ-ի թիվ 424ա հոդվածի հիմքով՝ ցեղասպանությունը` որպես մարդկության դեմ կատարված ոճիր, ժխտելը: Ըստ այդմ՝ Հայոց ցեղասպանության մերժումը համարվում է հանցագործություն և պատժվում է մինչև 3 տարի (չգիտակցված մերժման դեպքում) և 5 տարի (գիտակցված մերժման դեպքում) ազատազրկմամբ: Սլովակիայի գլխավոր դատախազը պետք է կիրառեր այս օրենքը և ազատազրկեր դեսպանուհուն: Սակայն գործը դրան չի հասել. դեսպանուհին նախընտրել է հրաժարվել իր խոսքերից և ասել է, թե Ցեղասպանության դեմ չի խոսել:
«Այսինքն` առաջին անգամ Թուրքիայի բարձր մակարդակի դիվանագետն ընդունեց Հայոց ցեղասպանության իրողությունը»,- հայտարարեց Ա. Գրիգորյանը՝ նշելով, որ այդ կապակցությամբ ֆորումը շնորհակալական նամակ է հղել նաև Թուրքիայի ԱԳՆ-ին:
Նշված օրենքի շրջանակներում ԵՀՄՖ-ն քր.գործ հարուցելու հայց է ներկայացրել նաև Ադրբեջանում, Ռուսաստանում և Հայաստանում (նստավայրը` Մոսկվա) Սլովակիայի դեսպան Յոզեֆ Միգաշի դեմ, որը հավակնում է լուրջ սկանդալի վերածվել: Ըստ Գրիգորյանի՝ դիվանագիտական անձեռնմխելիություն ունեցող անձն այդ կարգավիճակից չի կարող օգտվել իր սեփական երկրում: Հայոց ցեղասպանության փաստը բազմաթիվ անգամ ժխտելու համար Միգաշին, ամենայն հավանականությամբ, կպաշտոնազրկեն և հայրենիք վերադառնալուց հետո կձերբակալեն:
Ա. Գրիգորյանը հայտնեց, որ Սլովակիայի Գերագույն դատարանի նախագահ, նախկին փոխվարչապետ և արդարադատության նախարար Շտեֆան Հարաբինի հետ, ով 2004-ին աջակցել է օրենսդրական փոփոխությանը, մեկնելու են Ֆրանսիա, որտեղ կխորհրդակցեն և իրենց փորձը կփոխանցեն հայամետ գործիչներին, թե ինչպես գործել, որ Ցեղասպանության ժխտումը քրեականացնող օրինագիծը ընդունվի: Նրա խոսքով` պետք է կենտրոնանալ ոչ թե Հայոց ցեղասպանության, այլ ընդհանրապես ցեղասպանության ժխտման, կատարվածի արժեզրկման կամ անարգանքի արտահայտման դեպքերի վրա:
Լուսանկարը՝ PanARMENIAN Photo-ի
