Երեկ Լիբիայի պետական հեռուստատեսությունը հայտնել է, որ Լիբիայի կառավարությունը վերացրել է արտադրության և սպառման բոլոր հարկերը, ինչպես նաև առաջին անհրաժեշտության ապրանքների ներմուծման տուրքերը: Իսկ որպես «պատճառաբանություն» ներկայացվել են «Լիբիայի մեծ հաղթանակները ահաբեկչական կազմակերպությունների նկատմամբ»: Այս մասին հաղորդում է Reuters գործակալությունը:
Մինչդեռ Լիբիայից ստացվող լուրերը շարունակում են հակասական մնալ: Լիբիական պետական հեռուստատեսությունն անընդհատ հայտարարում է ապստամբների նկատմամբ տարած հաղթանակների մասին, մինչդեռ այլ աղբյուրներից այդ լուրերը կա՛մ չեն հաստատվում, կա՛մ հաստատվում են մասամբ: Ընդդիմությունը հաստատել է միայն Բեն Ջավադ քաղաքի կորուստը: Այս պահին հայտնի է, որ հիմնական պայքարը հիմա ընթանում է Ռաս Լանուֆ քաղաքի մերձակայքում: Լրատվամիջոցները փոխանցում են, որ տեղի հիվանդանոցն այլևս ի վիճակի չէ ընդունելու վիրավորներին, քանի որ այն լեփ լեցուն է:
ՄԱԿ-ի գլխավոր քարտուղար Պան Գի Մունը կիրակի օրը կոչ է արել լիբիական իշխանություններին վերջ դնել խաղաղ բնակչության վրա իրականացվող հարձակումներին և զգուշացրել Տրիպոլիին արդարադատության առաջ պատասխանատվության կանչվելու անխուսափելիությունից: Այս մասին հաղորդում է Associated Press գործակալությունը: Նա զրույց է ունեցել Լիբիայի արտաքին գործերի նախարար Մուսա Քուսայի հետ, որին կոչ է արել կատարել «քաղաքացիների պաշտպանության համար ստանձնած պարտավորությունները և հաշվի առնել Լիբիայի ժողովրդի ցանկությունը` ապրելու արժանապատիվ և խաղաղ»:
