Չինաստանում ճապոնական արտադրության մեքենաների սեփականատերերը ստիպված են «փրկել» իրենց մեքենաները ծայրահեղական տրամադրված քաղաքացիներից, որոնք համաձայն չեն Սենկակու վիճելի կղզիների (չինարեն անվանումը՝ Դյաոյույդաո) կարգավիճակի հետ:
Ինչպես հաղորդում է Rosbalt գործակալությունը, իրենց մեքենաները պահպանելու համար վարորդները սկսել են դրանց վրա փակցնել հետևյալ գրությունները. «Իմ մեքենան ճապոնական է, բայց սրտով ես չինացի եմ», «Ես իմ մեքենան գնել եմ նախքան Ճապոնիայի կառավարության կողմից Դյաոյույդաո կղզիների ազգայնացումը: Այժմ ես այլևս ճապոնական ապրանքներ չեմ գնում»: Այլ սեփականատերեր իրենց ճապոնական արտադրության մեքենաների վրա փակցնում են հակաճապոնական կարգախոսեր:
Շենսի մարզում ոստիկանությունը ձերբակալել է ծայրահեղական «հայրենասերներից» մեկին, որը մետաղե խողովակով մի քանի անգամ հարվածել է մի տղամարդու, երբ վերջինս փորձել է պաշտպանել իր ավտոմեքենան հարձակումից:
Հիշեցնենք. Սենակակու կղզիների շուրջ վեճը սրվեց այն բանից հետո, երբ սեպտեմբերի սկզբին Ճապոնիան հայտարարեց, որ մասնավոր սեփականատիրոջից գնում է կղզիներից երեքը: Չինաստանում այդ գործարքը զանգվածային հակաճապոնական ցույցերի տեղիք տվեց:
