ԱՄՆ պետքարտուղարի տեղակալի օգնական Ֆիլիպ Գորդոնը համաձայն չէ այն տեսակետի հետ, որ կազմակերպելով Հայաստանի եւ Ադրբեջանի նախագահների հանդիպումները, Ռուսաստանը ԼՂ կարգավորման գործընթացն աստիճանաբար վերցնում է իր վերահսկողության ներքո:
Ինչպես հաղորդում է Մեդիամաքսը, ամերիկացի դիվանագետն այս մասին ասել է` պատասխանելով Բրատիսլավայում ընթացող Globsec (Global Security) 2011 գիտաժողովի մասնակիցների հարցերին:
Ֆիլիպ Գորդոնն ասել, որ ՌԴ-ն աշխարհագրորեն ավելի մոտ է հակամարտող կողմերին, եւ նրան ավելի հեշտ է հանդիպում կազմակերպել Սոչիում, Մոսկվայում, Սանկտ-Պետերբուրգում կամ Աստանայում, քան ավելի հեռու գտնվող Վաշինգտոնում:
Դիվանագետն ասել է, որ Ռուսաստանը թափանցիկ է գործում եւ ԱՄՆ-ը եւ Ֆրանսիան տեղեկացվում են հանդիպումների մանրամասներին:
Համանախագահների միջեւ այս խնդրում առկա է փոխվստահություն, քանի որ նրանք հանդես ենք գալիս ընդհանուր շահերի պաշտպանության դիրքերից, ասել է Գորդոնը: «Իսկ այդ շահերը կայանում են Եվրոպայում համապարփակ անվտանգության ապահովման հրամայականով», – նկատել է նա:
Անդրադառնալով միջնորդների աշխատանքի վերաբերյալ Ադրբեջանում պարբերաբար հնչող դժգոհություններին` Ֆիլիպ Գորդոնն ասել, որ ԱՄՆ կարծիքով, Մինսկի խմբի համանախագահները շատ լավ են աշխատում:
