Ճապոնիայի վարչապետ Իոսիխիկո Նոդան անձամբ հայտարարել է իր նոր կաբինետի կազմի մասին, որում ներառվել է 10 նոր նախարար: Մյուս 8-ը` կառավարության խոսնակը, փոխվարչապետը, արտգործնախարարը, Տնտեսության և արդյունաբերության, Պաշտպանության նախարարները մնացել են իրենց պաշտոններում: Կառավարությունն այսօր ողջ կազմով հրաժարական է տվել:
Նոդան փոփոխություններով փորձում է բարձրացնել իր կաբինետի ժողովրդականությունը, որը վերջին շրջանում իջել է վտանգավոր գծից`30 տոկոսից: Այս մասին հայտնում է ITAR-TASS-ը:
Վարչապետն արդյունավետ է համարել արտգործնախարար Կոիտիրո Գեմբայի աշխատանքը` մասնավորապես ջանքերն այս տարի Ռուսաստանի հետ հարաբերությունների ակտիվացման գործում: Իր պաշտոնում է մնացել նաև Պաշտպանության նախարար Սատոսի Մորիմոտոն` երկրի պատմության մեջ այդ պաշտոնում առաջին ոչ կուսակցական մասնագետը:
Նոր կաբինետում պետական ռազմավարության նախարարի պաշտոնում նշանակվել է իշխող Դեմոկրատական կուսակցության քաղխորհրդի նախկին ղեկավար Սեյձի Մաեհարեին, որը հավակնում է վարչապետի պաշտոնին: Փոխվել է նաև Ֆինանսների նախարարը: Այդ պաշտոնում նշանակվել է Դեմոկրատական կուսակցության խորհրդարանական խմբակցության նախկին ղեկավար Կորիկի Ձյոձիման, որին բարդ աշխատանք է սպասվում` կապված բյուջետային մեծ պակասուրդի հետ:
Մշակույթի և սպորտի նախարարի պաշտոնում նշանակվել է Մակիկո Տանակաան, որը լայն ճանաչում է վայելում և կապեր ունի Չինաստանի ղեկավարության հետ: Նման նշանակումը դիտարկվում է որպես Չինաստանի հետ հարաբերությունների կարգավորման փորձ:
Նոր կաբինետի ձևավորումը անցկացվում է վարչապետի կողմից խորհրդարանի արձակման և արտահերթ համընդհանուր ընտրությունների նշանակման նախապատրաստման շրջանում: Նա դա խոստացել է ընդդիմությանը` եկամտահարկերի աստիճանական բարձրացման օրինագծի աջակցման դիմաց: Օրինագիծը նպատակ ունի կրճատել Ճապոնիայի վիթխարի պետպարտքը:
