Իսպանական մամուլի հաղորդմամբ՝ կատալոնական «Բարսելոնա»-ի գլխավոր մարզիչ Տիտո Վիլանովան համոզված է, որ իր թիմն արժանիորեն է հաղթել «Սևիլիա»-ին: Հիշեցնենք, որ Իսպանիայի առաջնության 6-րդ տուրի շրջանակներում երեկ տեղի ունեցավ «Սևիլիա» – «Բարսելոնա» հանդիպումը, որի ընթացքում մրցավարի կայացրած շատ որոշումներ խնդրահարույց էին:
«Չեմ կարծում, թե ոչ-ոքին արդար կլիներ այս խաղում: Իհարկե, 2-2 հաշիվը մեզ համար լավը կլիներ, սակայն մենք ստեղծել էինք բավականաչափ գոլային հնարավորություններ՝ հաղթանակի հասնելու համար: Ինչ վերաբերում է Մեդելի՝ խաղադաշտից հեռացվելուն, ապա ասեմ, որ երբ ֆուտբոլիստը փորձում է հարվածել մրցակից թիմի խաղացողին, ապա դրա համար կարելի է հեռացնել նրան խաղադաշտից: Հավելեմ նաև, որ «Սևիլիա»-ն մեծ հաջողությունների կհասնի, եթե առաջնության մնացած հատվածում խաղա այսպիսի ֆուտբոլ: Միչելի գլխավորությամբ թիմը շատ մեծ աճ է գրանցել»,- ասել է Վիլանովան:
