Սոմալիում իսլամիստական «Ալ-Շաբաբ» խմբավորումն այսօր հայտարարել է, որ իր ուժերը հետ են քաշվել իրենց գլխավոր հենակետից՝ Կիսմայո նավահանգստից, սակայն Աֆրիկյան միության զորքերի հետ մարտերը շարունակվում են: Այս մասին հաղորդում է ITAR-TASS-ը:
«Ալ-Շաբաբ»-ի մոջահեդների զինվորական հրամանատարությունը հրամայել է կեսգիշերին իրականացնել մարտավարական նահանջ,- հայտարարել է խմբավորման ներկայացուցիչ Ալի Մուհամմադ Ռաջեն:- Թշնամին դեռ չի վերցրել քաղաքը»:
Հինգշաբթի Քենիայի զորքերը, որոնք աջակցություն են ցուցաբերում Սոմալիի անցումային կառավարությանը, ուղղաթիռների ուղեկցությամբ ծովային դեսանտ իջեցրին Կիսմայոյում: Գործողությանը նախորդել էր հրետանային նախապատրաստում:
Չնայած բանակի հրամանատար Սայրուս Օգնուան հայտարարել է, որ Կիսմայո նավահանգիստն ընկել է, այսօր Աֆրիկյան միությունը խոստովանել է, որ առայժմ Քենիայի զորքերին հաջողվել է միայն շրջապատել քաղաքը: «Ալ-Շաբաբ»-ի օբյեկտների չեզոքացման գործողությունները շարունակվում են»,- ասվում է միության հաղորդագրության մեջ:
Գործակալությունը նշում է, որ Քենիայի զորքերին հաջողվել է վերահսկողության տակ վերցել օդանավակայանը և համալսարանական ավանը:
«Ալ-Շաբաբ»-ն իր հերթին ռադիոյով քաղաքի բնակչությանը ջիհադի կոչ է արել:
