Թուրքական Sabah թերթի փոխանցմամբ՝ Թուրքիան և Գամբիան փոխադարձաբար չեղյալ են հայտարարել գործող վիզային ռեժիմը: Այսպիսի որոշում է ընդունվել Նյու Յորքում Թուրքիայի արտգործնախարար Ահմեդ Դավութօղլուի ու նրա գամբիացի գործընկերոջ հետ հանդիպման ժամանակ:
Հանդիպման ժամանակ կողմերը ստորագրել են համագործակցության հուշագիր, որն իրենից ենթադրում է տնտեսական և միգրացիայի ոլորտներում համագործակցության ամրագրում: Սրանից առաջ էլ Դավութօղլուն Նյու Յորքում հանդիպել էր Հարավային Սուդանի արտգործնախարարի հետ, և հանդիպման ժամանակ ստորագրվել էր Հարավային Սուդանի հետ վիզային ռեժիմի վերացման համաձայնագիր:
Հիշեցնենք, որ Նյու Յորքում ընթացող ՄԱԿ ԳԱ-ի 67-րդ նստաշրջանում Թուրքիան պետք է ներկայացներ նախագահ Աբդուլլահ Գյուլը, որին, սակայն, նրա հիվանդության պատճառով բժիշկներն արգելեցին երկարատև ճամփորդության գնալ: Գյուլին պետք է փոխարիներ վարչապետ Ռեջեփ Էրդողանը, որը, սակայն, վերջին պահին անսպասելիորեն հրաժարվեց ԱՄՆ մեկնելուց: Արդյունքում ՄԱԿ ԳԱ-ի նիստում Թուրքիան ներկայացնում է արտգործնախարար Ահմեդ Դավութօղլուն:
