Սեպտեմբերի 21-ին Թբիլիսիի «Krtsanisi Residence» համալիրում տեղի է ունեցել ՀՀ անկախության 21-րդ տարեդարձին նվիրված պաշտոնական ընդունելություն, որը կազմակերպել էր Վրաստանում ՀՀ դեսպանությունը:
ՀՀ ԱԳՆ մամլո գրասենյակից «Առաջին լրատվական»-ին հայտնում են, որ հանդիսությանը մասնակցել են Վրաստանի պետական, քաղաքական, հասարակական ու գործարար շրջանակների բազմաթիվ ներկայացուցիչներ, Թբիլիսիում հավատարմագրված դիվանագիտական առաքելությունների ղեկավարներ, ռազմական կցորդներ, բարձրաստիճան հոգևորականներ, ինչպես նաև վրացահայ համայնքի հասարակական և մշակութային կառույցների տասնյակ ներկայացուցիչներ:
Ներկաներին ուղղված իր խոսքում Վրաստանում ՀՀ արտակարգ և լիազոր դեսպան Հովհաննես Մանուկյանը, անդրադառնալով անկախությունից ի վեր Հայաստանի ունեցած ձեռքբերումներին և խաղաղ համակեցության ու կայուն զարգացման նպատակների իրագործմանն ուղղված մարտահրավերներին, մասնավորապես նշեց. «Այսուհետ ևս Հայաստանի արձագանքը միանշանակ և վճռական է լինելու տարածաշրջանային անկայունությանն ուղղված ցանկացած տեսակի սադրանքներին: Մենք ցանկանում ենք հստակեցնել, որ հայկական պետականությունն ու արտերկրի հայ համայնքներն ունեն նշանակալից և ծանրակշիռ դերակատարություն, որոնց հետ հնարավոր չէ հաշվի չնստել նաև հետագայում»: Դեսպանը միևնույն ժամանակ, անդրադարձել է Վրաստանի հետ տարբեր ոլորտներում փոխգործակցության խորացման հեռանկարներին, ինչպես նաև բարձր է գնահատել վրացահայ համայնքի դերը երկու երկրների միջև հարաբերությունների զարգացման գործում:
Վրացական կողմից շնորհավորական խոսքով հանդես է եկել Վրաստանի ԱԳ նախարարի առաջին տեղակալ Նիկոլոզ Վաշակիձեն:
ՀՀ անկախության 21-րդ տարեդարձին նվիրված պաշտոնական ընդունելության ընթացքում տոնական երգերով հանդես են եկել Թբիլիսիի «Հայարտուն» մշակութային կենտրոնի սաները, ցուցադրվել են Հայաստանի վերաբերյալ տեսահոլովակներ:
