Foxconn թայվանական ընկերության չինական գործարանը, որտեղ հավաքվում են Apple ընկերության պլանշետներն ու սմարթֆոնները, այդ թվում՝ iPhone 5-ը, փակվել է աշխատակիցների զանգվածային ծեծկռտուքի պատճառով: 2000 աշխատակիցների մասնակցությամբ ծեծկռտուքին վերջ տալու գործում ներգրավվել է 5000 ոստիկան: Գործարանը փակվել է հետաքննության անցկացման համար: Միջադեպի հանգամանքները հայտնի չեն: Ինչպես տեղեկացնում է Newsru.com-ը՝ Foxconn ընկերությունը հայտնի է գերբեռնված աշխատող և գրոշներ ստացող աշխատակիցներով, որոնք հուսահատությունից ինքնասպանության են դիմում:
Apple ընկերությունը դեռ վաղուց մտածում է տխրահռչակ ընկերության ծառայությունից հրաժարվելու մասին: Խնդիրը լուծելու համար կողմերը համաձայնել են կիսել աշխատապայմանների բարելավման ծախսերը:
Աշխատակիցները հաճախ են իրենց ցած նետում գործարանի պատուհաններից, որոնք արդեն իսկ ցանցապատվել են:
Ինչպես քիչ առաջ տեղեկացրել էինք, թայվանական ընկերության գործարանում, որը տեղակայված է Չինաստանի հյուսիսային Թայունան քաղաքում, աշխատակիցների զանգվածային ծեծկռտուք էր տեղի ունեցել, որի հետևանքով տուժել էր առնվազն 40 մարդ:
