1962թ. այս օրը ԽՍՀՄ Գերագույն խորհրդի նախագահության հրամանագրով դերասան Ավետ Ավետիսյանին շնորհվեց ԽՍՀՄ ժողովրդական արտիստի պատվավոր կոչում:
ՀԽՍՀ ժողովրդական արտիստ (1938թ.), ԽՍՀՄ ժողովրդական արտիստ (1962թ.), ԽՍՀՄ պետական մրցանակակիր (1941թ.) Ավետ Ավետիսյանը (իսկական ազգանունը՝ Ոսկանյան) ծնվել է 1897թ. նոյեմբերի 12-ին (նոյեմբերի 24) Թիֆլիսում: 1905թ. ընդունվել է Ներսիսյան դպրոց, ուր մասնակցել է աշակերտական ներկայացումներին։
Մինչ բանակ մեկնելը (1916թ.) մանուֆակտուրայի խանութում աշխատել է իբրև աշակերտ և գործակատար։ Բանակից զորացրվելուց հետո (1918թ.) Բաքվում մասնակցել էՀովհաննես Աբելյանի թատերախմբի ներկայացումներին։
Բեմական մկրտությունը եղել է Ոսկանի (Ալեքսանդր Շիրվազադեի «Չար ոգի», 1918թ.) դերակատարումը։ Այնուհետև Աբելյանի հետ գալիս է Թիֆլիս, ուր խաղում է հայոց դրամատիկական խմբում: 1919թ. խաղացել է Թիֆլիսի հայոց դրամատիկական խմբում, 1920-1921-ին՝ Ղարաքիլիսայի (այժմ՝ Վանաձոր) թատրոնում՝ Ամո Խարազյանի խմբում։
1922-ից տեղափոխվել է Երևան, խաղացել շրջիկ թատերախմբում, ապա ընդունվել Գ. Սունդուկյանի անվան թատրոն և մինչև կյանքի վերջը ստեղծագործել այնտեղ։ Ավետիսյանը նկարահանվել է հայկական 28 կինոնկարում:
Մահացել է 1971թ. մարտի 20-ին Երևանում: Թաղված է Կոմիտասի անվան զբոսայգու պանթեոնում։
