Ադրբեջանը բողոքի նոտա է հղել Ռուսաստանի Լիբերալ դեմոկրատական կուսակցության ղեկավար, պետդումայի պատգամավոր Վլադիմիր Ժիրինովսկու՝ Անդրկովկասը Ռուսաստանին միավորելու վերաբերյալ հայտարարության դեմ:
Ինչպես հաղորդում է Trend գործակալությունը` Բաքվում Ռուսաստանի դեսպան Վլադիմիր Դորոխինին հրավիրել են Ադրբեջանի ԱԳՆ: ԱԳՆ փոխղեկավար Հալաֆ Հալաֆովը դեսպանին խիստ դժգոհություն է հայտնել այդ անպատասխանատու հայտարարության կապակցությամբ, ազգային թշնամանքի բռնկման և ահաբեկչության քաջալերման ու ադրբեջանցիների դեմ հանցագործությունների կոչերին, որոնք հնչել են Մոսկվայի քաղաքապետարանի թույլտվությամբ և «Հայ-ռուսական միասնության» ղեկավարությամբ կազմակերպված ցույցի ժամանակ, որն ուղղված էր Ռամիլ Սաֆարովին համաներման ենթարկելու դեմ:
Փոխնախարարը նաև նշել է, որ այդ անպատասխանատու կոչը ստվեր գցեց երկու երկրների համագործակցության և բարեկամական հարաբերությունների վրա: Ընդգծվել է, որ նման հայտարարությունները հարված են հասցնում Ռուսաստանի առաքելությանը, որպես Մինսկի ԵԱՀԿ խմբի միջնորդ երկրի՝ Լեռնային Ղարաբաղի հակամարտության կարգավորման գործում: Այս մասին հաղորդում է Ադրբեջանի ԱԳՆ մամլո ծառայությունը:
Հալաֆովը հույս է հայտնել, որ Ժիրինովսկու անպատասխանատու հայտարարությանը Ռուսաստանի պետական կառույցներում կտրվի համապատասխան գնահատական:
Նշենք, որ ավելի վաղ Վլադիմիր Ժիրինովսկին հայտարարել էր, որ Ադրբեջանը և Հայաստանը առանց Ռուսաստանի չեն կարող լուծել արցախյան հակամարտությունը:
