«Ես և Սամվել Բալասանյանը մտերիմ ընկերներ ենք եղել, իսկ այսօր ամեն մեկս իր ճանապարհն է ընտրել». այսօր լրագրողների հետ հանդիպման ժամանակ այս մասին ասաց ԱԺ ՕԵԿ խմբակցության պատգամավոր Հովհաննես Մարգարյանը՝ պատասխանելով հարցին՝ շնորհավորե՞լ է Սամվել Բալասանյանին Գյումրու քաղաքապետ ընտրվելու կապակցությամբ:
Նա հստակեցրեց, որ այս հարցին ավելի վաղ պատասխանել է, ուստի այսօր դրան անդրադառնալ չէր ցանկանա: «Մենք երկուստեք, երբ պաշտոն ենք ստացել, իրար չենք շնորհավորել: Մենք շատ մտերիմ ընկերներ ենք եղել, ես կոռեկտ չեմ համարում անձնական հարաբերություններին անդրադառնալ, որոնք այսօր չկան, որովհետև մեզնից ամեն մեկը իր ճանապարհն է ընտրել»,- ասաց Հովհաննես Մարգարյանը:
Խոսելով երեկ Եվրախորհրադարանում Ռամիլ Սաֆարովի էքստրադիցիայի վերաբերյալ ընդունված բանաձևի մասին՝ նա ասաց, որ սա կարելի է անվանել սառույցի առաջին ճեղքվածք, որը հնարավորություն կտա, հետևողական աշխատանքի արդյունքում, համարժեք գնահատականների արժանանալ, սա համարժեք չէր, սա սկզիբն էր:
«Չպետք է ձեռքներս ծալած նստենք, պետք է ապացուցենք աշխարհին, որ Ղարաբաղի ժողովուրդն Ադրբեջանի կազմում չի կարող ապրել, նրանք չեն կարող ապահովել անվտանգությունն այդտարածքում: Իսկ անվտանգության երաշխիքն անկախության ճանաչումն է՝ որպես անկախ պետություն: ՀՀ իշխանություններն ամեն ինչ արել և անում են, որ Մինսկի խմբի ձևաչափով լուծվի այս հարցը»,- մեկնաբանեց պատգամավորը:
Անդրադառնալով ԲՀԿ-ական պատգամավոր Նաիրա Զոհրաբյանի հայտարարությանը՝ ԵԺԿ-ին դիմելու մասին՝ նա ասաց, որ ԵԺԿ-ի փոխնախագահը հենց Հունգարիայի այն վարչապետն է, որը իրեն միշտ անհավասարակշիռ էր թվում: «Չեմ ուզում, որ նա մնա պաշտոնին, պետք է նպաստենք, որ բոլորի կողմից հասկանալի լինի՝ անձամբ ինքն է կատարելՍաֆարով գործարքը»,- նկատեց Հովհաննես Մարգարյանը՝ կարծիք հայտնելով, որ Հայաստանում ԵԺԿ անդամ կուսակցությունները մեկ ընդհանուր որոշում կկայացնեն՝ ինչպես դիմել և այս հարցը ԵԺԿ-ում բարձրացնել:
