Չինաստանում նավթագազային ենթակառուցվածքների ոլոտում գործունեություն ծավալած Fortune Oil ընկերությունը Հայաստանի հանքարդյունաբերությունում ներդնելու է 500 միլիոն դոլար:
Վարչապետ Տիգրան Սարգսյանը փետրվարի 23-ին ընդունել է «Ֆորչյուն Օյլ» ընկերության պատվիրակությանը՝ ընկերության գործադիր փոխնախագահ Դանիել Չյուի գլխավորությամբ:
Ընկերության ներկայացուցիչները նշել են, որ կարևորում են Հայաստանում կատարվելիք ներդրումները, որոնք կիրականացվեն երկու փուլով, և որոնց ընդհանուր արժեքը համարժեք կլինի շուրջ կես միլիարդ ԱՄՆ դոլարի: Նշվածի վերաբերյալ խոսեցինք Հայաստանի էկոլոգիական հասարակական դաշինքի համակարգող Սիլվա Ադամյանի հետ և փորձեցինք ճշտել, թե հարցի վերաբերյալ ի՞նչ դիրքորոշում ունի ավելի քան 50 հասարակական կազմակերպությունների միավորումը։ «Վտանգն ակնհայտ է, մեր երկիրը դարձել է մի փոս, որտեղից ուզում են կորզել և վաճառել՝ ինչ հնարավոր է»,-մեր հետ զրույցում նշեց Սիլվա Ադամյանը` հավելելով, որ առայժմ իրենք սպասում են հանրության արձագանքներին:
«Էկոլուր» ՀԿ նախագահ Ինգա Զառաֆյանը նշեց, որ իրենք առայժմ սպասում են Հրազդանի Օրհուս կենտրոնի արձագանքին, սակայն ցանկացած կերպ աջակցելու են բնապահպանական կառույցներին: Իսկ «Հանուն մարդկային կայուն զարգացման ասոցիացիայի» նախագահ Կարինե Դանիելյանի խոսքով` այն, ինչ տեղի կունենա, ահավոր բան է լինելու, և ցավալին այն է, որ, ինչպես միշտ, բնապահպանների կարծիքը ոչ մի առումով հաշվի չի առնվել:
Նշենք, որ հանքավայրերը, որտեղ գործունեություն է ծավալելու ընկերությունը, գտնվում են Հրազդանում, Աբովյանում և Սվարանց գյուղում, իսկ ծրագրի իրագործումը կսկսվի 2014 թվականին:
