Անգլիայի հավաքականի պաշտպան Ջոն Թերին վնասվածք է ստացել Մոլդովայի ընտրանու հետ խաղի ժամանակ: Ֆուտբոլիստը կարող է բաց թողնել Ուկրաինայի ազգային թիմի հետ` «Ուեմբլի» մարզադաշտում սեպտեմբերի 11-ին կայանալիք հանդիպումը:
«Ջոնը մարտիկ է: Նա դիմացավ ցավին խաղի 20-րդ րոպեից: Հուսով եմ` վնասվածքը շատ լուրջ չի լինի: Սակայն պետք չէ մոռանալ, որ առաջիկա հանդիպումը կայանալու է 3 օր հետո: Նման դեպքերում տհաճություն կարող է պատճառել անգամ ամենաթեթև վնասվածքը»,- ասել է անգլիացիների գլխավոր մարզիչ Ռոյ Հոջսոնը:
Հիշեցնենք, որ Անգլիայի ընտրանին խոշոր` 5:0 հաշվով հաղթանակ է տարել մոլդովացիների նկատմամբ: «Չելսի»-ի պաշտպանի ստացած վնասվածքի պատճառով անգլիացիները խաղն ավարտել են 10 ֆուտբոլիստներով:
