Վլադիմիր Կլիչկո – Մանուել Չար չեմպիոնական մենամարտը տեղի է ունենալու սեպտեմբերի 8-ին Մոսկվայում: Այսօր բռնցքամարտիկներն անցկացրին կշռման պաշտոնական արարողությունը, որից հետո պարզ դարձավ, որ չնայած նախնական ցուցանիշին՝ Կլիչկոն, այնուամենայնիվ, երեք կիլոգրամ ավելի է կշռում, քան Չարը (112.5 – 109.5): Այս արարողությունից հետո, ըստ ավանդույթի, տեղի ունեցավ նաև բռնցքամարտիկների «հայացքների բախում»-ը:
«Աչքերն ուղղակի հոգու հայելին են. դրանցում շատ բան կարելի է տեսնել: Ես տեսա, որ հեշտ չի լինելու. լարված պայքարում է անցնելու մենամարտը: Չարն այստեղ չի եկել պարզապես մենամարտելու. նա եկել է պայքար մղելու: Այնպես որ, պայքար կլինի»,- ասել է Կլիչկոն լրագրողների հետ զրույցում:
Խոսելով Չարի պահվածքի մասին՝ Կլիչկոն նշել է. «Ոչ մի վատ բան չեմ տեսել նրա վարքագծում: Նա մոտիվացնում է իրեն՝ ինձ հետ մենամարտելու համար, վստահ է իր վրա, կարող եմ ասել անգամ՝ հանդուգն է: Ոչ մի տարօրինակ բան սրանում չկա: Անկախ ամեն ինչից՝ այդքան էլ կարևոր չէ, թե մարզիկն իրեն ինչպես է պահում մամլո ասուլիսի ժամանակ, այլ կարևորն այն է, թե նա ինչպես է դրսևորում իրեն ռինգում»:
