Քիչ անց Լիբիայի ղեկավարը դիմելու է մայրաքաղաք Տրիպոլիից դեպի արևմուտք գտնվող Ալ-Զավիյա քաղաքի բնակիչներին, որոնք ապստամբել են նրա իշխանության դեմ: Այս մասին հաղորդում է Al-Arabia-ն:
Հայտնի է, որ այստեղ տեղի ունեցող մարտերի արդյունքում Քադաֆիին պաշտպանող ուժերն ավերել են մի մզկիթ, որի մոտ տեղի էին ունենում բողոքի ակցիաները:
Ընդհանուր անվտանգության ժողովրդական կոմիտեն իր հերթին դիմել է ազգաբնակչությանը` հայտնելով, որ բոլոր նրանք, ովքեր կհանձնեն զենքը և կներկայանան իրավապահներին, ներում կստանան և չեն հետապնդվի օրենքով:
Այդուհանդերձ, Քադաֆիի հատուկ ծառայությունն այնքան էլ «բարի» չէ իր ձգտումներում. հայտնի է դարձել, որ Քադաֆիի արարողակարգի նախկին ղեկավարի աղջիկները գերեվարվել են այն բանից հետո, երբ Փարիզում գտնվող նրանց հայրը դեմ է արտահայտվել Քադաֆիին և կոչ արել միանալ ցուցարարներին:
Հիմա մարտեր են գնում մի քանի քաղաքներում` Ալ-Զավիյա, Միստրատա, Բենղազի, որոնք մեծամասամբ վերահսկվում են ապստամբների կողմից: Ամենակատաղի մարտերն այս պահին Միստրատայի շրջանում է, որը գտնվում է Տրիպոլիից երկու հարյուր կիլոմետր հեռավորության վրա: