Ի՞նչ ունեն ու չունեն Վանաձորի քաղաքապետի թեկնածուները, ով որքան եկամուտ է ստանում տարեկան, ի՞նչ սեփականություն ունի, ով որտեղ է աշխատել և ինչքան է վաստակել` ներկայացնում ենք ստորև:
Սկսենք ամենահարուստից:
Թեկնածուներից ամենահարուստը գործող քաղաքապետ Սամվել Դարբինյանն է: Նրա դրամական միջոցները կազմում են 105 միլիոն 120 հազար դրամ: Նա ունի ոչ թե սեփական բնակարան, այլ սեփական բազմաբնակարան շենք Վանաձորի Ազատամարտիկների նրբանցքի 4 հասցեում՝ 4.204,8 քմ մակերեսով: Ունի նաև 680 քմ մակերեսով հողամաս, Տոյոտա մակնիշի ավտոմեքենա:
Բացի քաղաքապետարանից ստացած 2 միլիոն 481 հազար 879 դրամ աշխատավարձից` Սամվել Դարբինյանը եկամուտ ունի նաև եղբորը պատկանող «Արգիշտի-1» ՍՊԸ-ից, քանի որ բաժնետեր է՝ 23 մլն 175 հազար դրամ շահաբաժնով:
Եկամուտների չափով երկրորդ տեղում քաղաքապետի թեկնածու, «Օրանժ Արմենիա» ընկերության Վանաձորի մասնաճյուղի նախկին տնօրեն Տարոն Ապրեսյանն է: Նրա դրամական միջոցները կազմում են 5 միլիոն դրամ և 3500 դոլար: Վանաձորի Լազյան 5 հասցեում ունի 94,5 քմ մակերեսով բնակարան, 164 քմ մակերեսով հողամաս, 2 ավտոմեքենա՝ 1998 թվականի արտադրության «Մերսեդես Բենց» և 2011 թվականի արտադրության «Մազդա-6»: Բացի «Օրանժ Արմենիա» ընկերությունից ստացած 5 միլիոն 58 հազար 544 դրամից, եկամուտ ունի նաև Վանաձորում գտնվող, նախկինում ԱԺ պատգամավոր Վահրամ Բաղդասարյանին պատկանող «Սաննի Սիթի» սուպերմարկետից՝ 1 մլն 710 հազար դրամի չափով:
Երրորդը Լոռու մարզպետի նախկին տեղակալ Էդիկ Կարախանյանն է: Մեկ տարվա ընթացքում նրա եկամուտը կազմել է 2 մլն 510 հազար դրամ՝ մարզպետարանից ստացած աշխատավարձը: Նրան է պատկանում «Էդիկ Կարախանյան և ընկերներ» ՍՊԸ-ի 70 տոկոս բաժնեմասը: Է. Կարախանյանը Դեմիրճյան 1 նրբանցքի 5/2 հասցեի 307,58 քմ մակերեսով առանձնատան, 409 քմ մակերեսով հողամասի սեփականատերն է և Դեմիրճյան 2/4 հասցեում գտնվող 240 քմ բնակավայրի հողատարածքի վարձակալը:
Ունեցած գումարի չափով չորրորդ տեղում Տիգրան Գրիգորյանն է՝ 1 մլն 254 հազար դրամով: Վանաձորում ունի 72,21 քմ մակերեսով բնակարան, օգոստոսին ձեռք է բերել «Ֆոլկսֆագեն Պոլո» մակնիշի ավտոմեքենա, «Ռոսսոտրուդնիչեստվո» դաշնային գործակալությունից 1 տարվա ընթացքում ստացել է 787 դոլար եկամուտ:
Թեև ստացած եկամտի չափով վերջին տեղում է «Պոպուլեքս» ՍՊԸ տնօրեն Կարեն Թումանյանը՝ 667 հազար 560 դրամով, սակայն նա, թերևս, ունեցած սեփականությունների թվով առաջինն է: Այսպես՝ Կարեն Թումանյանը Տիգրան Մեծի պողոտայում` 52-10/1 հասցեում, 330 քմ մակերեսով, և 52-10/2 հասցեում` 310 քմ մակերեսով հողամասեր ունի, բնակարաններ ունի Կարեն Դեմիրճյան 21/34 հասցեում (91,88 քմ) և Զորավար Անդրանիկի 56/8 հասցեում (31,5 քմ), ունի նաև 1998 թվականի արտադրության «Մերսեդես Բենց» մակնիշի ավտոմեքենա:
