Վերջին ամիսներին փախստականի կարգավիճակ ստանալու համար դիմել է 114 սիրիահայ: Այս մասին «Առաջին լրատվական»-ին տեղեկացրեցին Միգրացիոն պետական ծառայությունից` հավելելով, որ դիմորդների մեծ մասը դիմել է հուլիս-օգոստոս ամիսներին:
Ծառայության աշխատակցուհին նաև ասաց, որ փախստականի կարգավիճակ ստացածները դեռևս փոքրաթիվ են, նոր քննություն է սկսվել ՄՊԾ-ում, հարցումներ են իրականացվում, որից հետո արդեն իսկ կարգավիճակ ստացածների հստակ պատկերը պարզ կլինի:
Նշենք, որ փախստականի կարգավիճակ ստանալու դիմումից հետո միայն 3 ամիս անց է դիմողը ստանում կարգավիճակ, եթե խնդիրներ չեն առաջանում, որովհետև դրանց առաջացման դեպքում կարգավիճակի տացման գործընթացը երկարաձգվում է ևս 3 ամսով:
ՄՊԾ աշխատակցուհին նաև տեղեկացրեց, թե որոնք են փախստականների արտոնություններն ու իրավունքները: ՀՀ-ում փախստականը բոլոր իրավունքներով հավասարեցված է ՀՀ քաղաքացու իրավունքներին, բացի ընտրելու և ընտրվելու իրավունքից: Եթե փախստականը ստանում է ՀՀ-ում օրինական բնակության իրավունք, ստանում է ճամփորդական փաստաթուղթ, ունի աշխատելու, բուժվելու, սովորելու իրավունք, ինչպես բոլոր քաղաքացիները, սակայն փախստականի դեպքում ՄՊԾ-ն փախստականի դիմումի հիման վրա կարող է միջնորդել համապատասխան մարմնին, նախարարությանը, որպեսզի անհրաժեշտության դեպքում փախստականը անվճար` պետպատվերի շրջանակում բուժում ստանա կամ ուսման վարձի զեղչ ստանա:
ՄՊԾ աշխատակցուհու վստահեցմամբ` բնակության վայրի հարցը լուծվում է փախստականի կարգավիճակ ստանալու մասին դիմումին զուգահեռ, քանի որ դիմումում նշվում է` անձն ունի՞ կացարանի կարիք, թե՝ ոչ: «Դիմումը ստանալուց հետո նրանց տրամադրվում է 3-ամսյա վկայական Հայաստանում մնալու, քանի դեռ փախստականը կացարան հայցող է, տեղավորվում է հատուկ կացարանում, իսկ կարգավիճակ ստանալուց հետո տեղավորվում է ժամանակավոր կացարանում»,- հստակեցրեց ՄՊԾ ներկայացուցիչը:
