Ազգային ժողովի նորակազմ Էթիկայի հանձնաժողովի օգոստոսի 31-ի նիստի օրակարգում կատարվել է լրացում: Ըստ ԱԺ պաշտոնական կայքէջի, հանձնաժողովը նախատեսում է քննարկել ոչ միայն ՀՀ քաղաքացի, Արարատի մարզի Դվին գյուղի բնակիչ Արթուր Զադոյանի, այլև` «Հանրային տեղեկատվություն և գիտելիքի կարիք» (ՓԻՆՔ Արմենիա) հասարակական կազմակերպության դիմումների քննության վերաբերյալ հարցերը:
«Փաստինֆո» գործակալության հարցին ի պատասխան, «Հանրային տեղեկատվություն և գիտելիքի կարիք» ՀԿ-ից հայտնել են, որ իրենց դիմումը վերաբերում է ԱԺ պատգամավորներ Արծվիկ Մինասյանի և Էդուարդ Շարմազանովի կողմից «ատելության հիմքով կատարված հանցագործությունը` DIY ակումբի պայթեցումը, հրապարակայնորեն արդարացնելուն»:
Նշվել է, որ նամակը ուղարկվել է նաև ՀՀ Բարձրաստիճան պաշտոնատար անձանց էթիկայի հանձնաժողովին, սակայն վերջինը պարզաբանել է, որ «այս խնդրի կարգավորման համար իրավասու չէ»:
«ԱԺ էթիկայի հանձնաժողովին ուղղված նամակը կոչ է անում վերջինիս համապատասխան քննություն իրականացնել և որոշում կայացնել պատգամավորի էթիկայի կանոնները խախտելու վերաբերյալ, ինչը մտնում է վերջինիս իրավասության մեջ համաձայն ԱԺ կանոնակարգի հոդված 24.2-ի:
Ինչպես «Փաստինֆո»-ն ավելի վաղ հայտնել էր, Ա. Զադոյանի դիմումը վերաբերում է համամասնական ընտրակարգով` «Բարգավաճ Հայաստան» կուսակցության ընտրական ցուցակից ԱԺ պատգամավոր ընտրված Կարո Կարապետյանին: Նրանց միջև դեռևս 2009թ. տեղի է ունեցել վիճաբանություն, ապա ծեծկռտուք, հնչել են կրակոցներ, ինչի կապակցությամբ հարուցվել է քրեական գործ: Նախապես երկուսն էլ հանդիսացել են վկաներ, հետագայում` 2010թ., Ա. Զադոյանին առաջադրվել է մեղադրանք` ՀՀ ԱԺ պատգամավոր, Արարատի մարզի Շահումյան գյուղի բնակիչ Կ. Կարապետյանի առողջությանը դիտավորությամբ միջին ծանրության վնաս պատճառելու համար:
Ա. Զադոյանը տևական ժամանակ պահանջում է, որ Կարապետյանին ևս մեղադրանք առաջադրվի և վերջինս չօգտվի պատգամավորին վերապահված անձեռնմխելիության իրավունքից: Ընթացիկ տարվա մայիսի սկզբին Ա. Զադոյանը դիմել է նաև ՀՀ նախագահ Սերժ Սարգսյանին:
