Այսօր զբաղեցրած պաշտոնից հեռանալու և ցուցարարներին միանալու մասին է հայտարարել Լիբիայի ներքին գործերի նախարար Աբդ Ալ-Ֆատահ Յունուսը: Նա կոչ է արել բանակին նույնպես միանալ ժողովրդի արդար պահանջին:
Նախարարը պնդում է, որ Լիբիայի նախագահ Մուամար Քադաֆին փորձել է իրեն սպանել և հետագայում մեղքը գցել ապստամբների վրա: «Նա անազնիվ մարդ է»,- Al-Jazeera հեռուստաալիքին ասել է Յունուսը: Ըստ նախարարի` իր վրա կրակել են, սակայն ծանր վիրավորվել է քույրը, որը հիմա գտնվում է հիվանդանոցում: «Քադաֆին էր հրամայել սպանել ինձ, որ հետագայում դա բարդեր ցուցարարների վրա»,- ավելացրել է նախկին նախարարը: Այդ քայլին ռեժիմը գնացել է այն պատճառով, որ Յունուսը հրաժարվել է կրակել խաղաղ ցուցարարների վրա:
Մի շարք լրատվամիջոցներ տեղեկացնում են, որ լիբիական բանակի որոշ ստորաբաժանումներ տեղափոխվում են Տրիպոլիից ոչ հեռու գտնվող Սաբրաթա քաղաք: Ըստ նույն աղբյուրների` այս քայլը հավանաբար կապված է Տրիպոլիում պետական շինությունների շահագործման անհնարինության հետ, քանի որ դրանց զգալի մասն ավերվել է: