Այսօր ԵՊՀ ուսանողների՝ պաշտպանության նախարար Սեյրան Օհանյանի հետ հանդիպմանը ներկա էր նաև ԿԳ նախարար Արմեն Աշոտյանը: Նա ասաց, թե երբ տեղեկացել է, որ Սեյրան Օհանյանը հանդիպելու է ԵՊՀ ուսանողների և պրոֆեսորադասախոսական կազմի հետ, չի ցանկացել առիթը բաց թողնել, և ինքը ևս ներկայացել է հանդիպմանը։ Ավելին՝ նկատեց, որ պաշտպանության նախարարի անհատական կերպարը հաճելի է ոչ միայն իրեն և ուսանողներին, այլև մի շարք պաշտոնյաների: ԿԳ նախարարը ևս կարևորեց ԿԳ և ՊՆ համագործակցությունը` նկատելով, որ կրթությունը և պաշտպանությունը ազգային անվտանգության ներքին և արտաքին պատերն են, և ավելացրեց նաև եկեղեցին ու մշակույթը: «Այս չորս համակարգերը պետք է պաշտպանեն անցյալի վրա խարսխված ապագան»,- ասաց ԿԳ նախարար Արմեն Աշոտյանը: Ի դեպ, միջոցառման վերջում ՊՆ Սեյրան Օհանյանը պարգևներ հանձնեց ԵՊՀ և ՊՆ համագործակցության շրջանակներում զորամասեր այցելած համալսարանական դասախոսներին: ԵՊՀ-ն իր հերթին պարգևատրեց ՊՆ այն ներկայացուցիչներին, ովքեր զգալի ներդրում են ունեցել երկու կառույցների համագործակցության ամրապնդման և զարգացման գործում: